ທ່ານ ວາງຢີ້ ລັດຖະມົນຕີກະຊວງການຕ່າງປະເທດຈີນ ກ່າວໃນໂອກາດ ຖະແຫຼງຂ່າວຮ່ວມກັບທ່ານ ອາລານ ປີເຕີ ຄາເຢທາໂນ ລັດຖະມົນຕີກະຊວງການຕ່າງປະເທດຟິລິບປິນຢູ່ນະຄອນຫຼວງມະນີລາເມື່ອວັນທີ 25 ກໍລະກົດນີ້ວ່າ, ໃນຖານະເປັນປະເທດໃກ້ຄຽງທີ່ໃຫຍ່ທີ່ສຸດຂອງຟິລິບປິນ, ຈີນຍິນດີເປັນຄູ່ຮ່ວມມືທີ່ຈິງໃຈ ແລະຖາວອນທີ່ສຸດບົນເສັ້ນທາງພັດທະນາປະເທດຟິລິບປິນໃຫ້ຈະເລີນກ້າວໜ້າຂຶ້ນ.
ທ່ານ ວາງຢີ້ ກ່າວວ່າ, ຈີນຈະສະໜັບສະໜູນຟິລິບປິນ 5 ດ້ານຄື: ໜຶ່ງ, ເດັດດ່ຽວສະໜັບສະໜູນການປະຕິບັດນະໂຍບາຍການຕ່າງປະເທດທີ່ເປັນເອກະລາດເປັນເຈົ້າຕົນເອງ ແລະຊອກຫາເສັ້ນທາງພັດທະນາທີ່ສອດຄ່ອງກັບສະພາບຂອງປະເທດຕົນ; ສອງ, ເດັດດ່ຽວສະໜັບສະໜູນການປາບປາມອາຊະຍາກຳຢາເສບຕິດແລະລັດທິກໍ່ການຮ້າຍ; ສາມ, ເດັດດ່ຽວສະໜັບສະໜູນນະໂຍບາຍມິດຕະພາບແລະຮ່ວມມືກັບຈີນທີ່ຄັດເລືອກໂດຍທ່ານປະທານາທິບໍດີດູເຕີເຕ; ສີ່, ເດັດດ່ຽວສະໜັບສະໜູນການປະຕິບັດໜ້າທີ່ເປັນປະທານປະເທດໝູນວຽນອາຊຽນໃຫ້ປະສົບຜົນສຳເລັດ ແລະຫ້າ, ເດັດດ່ຽວສະໜັບສະໜູນຟິລິບປິນແລະປະເທດອື່ນໆໃນອາຊຽນໃນການປົກປັກຮັກສາສັນຕິພາບແລະສະຖຽນລະພາບຂອງທະເລຈີນໃຕ້.
 |
