ທ່ານຢາງເຈສື ທີ່ປຶກສາແຫ່ງລັດຈີນ ແລະ ທ່ານນີໂກລາຍ ປາຕຣູເຊັຟ ເລຂາທິການກອງປະຊຸມຄວາມໝັ້ນຄົງສະຫະພັນຣັດເຊຍ ໄດ້ຮ່ວມກັນເປັນປະທານກອງປະຊຸມປຶກສາຫາລືຄວາມໝັ້ນຄົງທາງຍຸດທະສາດລະຫວ່າງສອງປະເທດຮອບທີ 13 ຢູ່ນະຄອນຫຼວງປັກກິ່ງໃນວັນທີ 26 ກໍລະກົດນີ້.
ທ່ານຢາງເຈສື ຊີ້ວ່າ: ພາຍໃຕ້ການນຳພາທາງຍຸດທະສາດຂອງທ່ານສີຈິ້ນຜິງ ປະທານປະເທດຈີນ ແລະ ທ່ານວລາດີເມຍ ປູຕິນ ປະທານາທິບໍດີຣັດເຊຍ, ສາຍພົວພັນລະຫວ່າງສອງປະເທດໄດ້ຮັກສາການພັດທະນາໃນລະດັບສູງ ແລະ ພວມຢູ່ໃນໄລຍະທີ່ດີທີ່ສຸດໃນປະຫວັດສາດ.
ທ່ານປາຕຣູເຊັຟ ກ່າວວ່າ: ການພັດທະນາສາຍພົວພັນຄູ່ຮ່ວມປະສານງານທາງຍຸດທະສາດລະຫວ່າງສອງປະເທດແມ່ນທິດທາງບຸລິມະສິດຂອງປະເທດຕົນ. ຣັດເຊຍຍິນດີຮ່ວມກັບຈີນ ລົງເລິກການຮ່ວມມືດ້ານຄວາມໝັ້ນຄົງທາງຍຸດທະສາດຢ່າງບໍ່ຢຸດຢັ້ງ ແລະ ເພີ່ມທະວີການປະສານສົມທົບກັບຈີນໃນກິດຈະການສາກົນ.
ຂ່າວແຈ້ງອີກວ່າ: ສອງຝ່າຍຍັງໄດ້ແລກປ່ຽນຄວາມເຫັນກ່ຽວກັບສາຍພົວພັນລະຫວ່າງສອງປະເທດ, ການຮ່ວມມືໃນກິດຈະການສາກົນແລະໃນຂອບຫຼາຍຝ່າຍ ພ້ອມດ້ວຍບັນຫາຕ່າງໆທີ່ເປັນບັນຫາຈຸດຮ້ອນໃນສາກົນແລະພາກພື້ນ ແລະໄດ້ບັນລຸຄວາມເປັນເອກະພາບກັນຢ່າງກວ້າງຂວາງ.
ສອງຝ່າຍຍັງເຫັນດີເພີ່ມທະວີການແລກປ່ຽນແລະປະສານງານ ເພື່ອຊຸກຍູ້ກອງປະຊຸມຜູ້ແທນຂັ້ນສູງກິດຈະການຄວາມໝັ້ນຄົງແຫ່ງຊາດຂອງປະເທດບຣິກສ໌ຄັ້ງທີ 7 ໃຫ້ປະສົບຜົນສຳເລັດ.
