ກະຊວງຍຸຕິທຳໄທຢືນຢັນໃນວັນທີ 25 ກໍລະກົດນີ້ວ່າ: ໄດ້ເລີ່ມອາຍັດບັນຊີທະນາຄານ 12 ບັນຊີຂອງທ່ານນາງຍິ່ງລັກ ຊິນນະວັດ ອະດີດນາຍົກລັດຖະມົນຕີປະເທດຕົນຫຼັງຕັດສິນຍຶດຊັບໃນຄະດີຈຳນຳເຂົ້າ. ຂະນະທີ່ທ່ານນາງຍິ່ງລັກ ກໍໄດ້ຢືນຢັນໃນສື່ສັງຄົມອອນລາຍວ່າ ລັດຖະບານໄດ້ອາຍັດຊັບສິນຂອງຕົນ.
ສານສູງສຸດຂອງໄທຈະຕັດສິນຄະດີຈຳນຳເຂົ້າໃນວັນທີ 25 ເດືອນໜ້ານີ້ ແລະຖ້າວ່າທ່ານນາງຍິ່ງລັກຖືກຕັດສິນວ່າກະທຳຜິດ ກໍຈະຖືກລົງໂທດໜັກສຸດຈຳຄຸກ 10 ປີ.
ໂຄງການຈຳນຳເຂົ້າແມ່ນນະໂຍບາຍໜຶ່ງຂອງທ່ານນາງຍິ່ງລັກ ທີ່ເລີ່ມປະຕິບັດຂະນະທີ່ທ່ານຫາກໍຂຶ້ນດຳລົງຕຳແໜ່ງນາຍົກລັດຖະມົນຕີໄທເມື່ອເດືອນສິງຫາປີ 2011 ໂດຍລັດຖະບານຈຳນຳເຂົ້ານຳກະສິກອນໃນລາຄາແພງກວ່າຕະຫຼາດ ແຕ່ຕໍ່ມາຖືກຕຳໜິວ່າສົ່ງຜົນເຮັດໃຫ້ຂາດທຶນ ທັງເກີດການສໍ້ລາດບັງຫຼວງຢ່າງຫຼວງຫຼາຍ.
