ທ່ານວລາດີເມຍ ປູຕິນ ປະທານາທິບໍດີຣັດເຊຍກ່າວຂະນະຢ້ຽມຢາມແຟງລັງໃນວັນທີ 27 ກໍລະກົດນີ້ວ່າ: ການຮ່ວມມືດ້ານການທະຫານລະຫວ່າງຣັດເຊຍ-ຈີນບໍ່ໄດ້ເລັ່ງໃສ່ຝ່າຍທີ 3 ເປັນເປົ້າໝາຍ.
ຕອນບ່າຍຂອງວັນດັ່ງກ່າວ, ທ່ານປູຕິນ ແລະ ທ່ານຊາວລີ ນີນີສໂຕ ປະທານາທິບໍດີແຟງລັງ ໄດ້ພົບປະຫາລືກ່ຽວກັບການຮ່ວມມືລະຫວ່າງສອງປະເທດ, ສະຖານະການພາກພື້ນ ແລະ ບັນຫາສາກົນ. ຫຼັງພົບປະ, ທ່ານປູຕິນ ໄດ້ຖະແຫຼງຂ່າວຮ່ວມ ໂດຍຕອບນັກຂ່າວທີ່ຖາມເຖິງການຊ້ອມຮົບຮ່ວມທາງທະເລລະຫວ່າງຣັດເຊຍ-ຈີນຢູ່ທະເລບານຕິກ.
ທ່ານປູຕິນ ກ່າວຕື່ມວ່າ: ຣັດເຊຍແລະຈີນມີການຮ່ວມມືທາງຍຸດທະສາດຢ່າງກວ້າງຂວາງ ລວມທັງດ້ານເສດຖະກິດ, ການເມືອງ ແລະ ການທະຫານ, ຂະນະທີ່ການຮ່ວມມືເຫຼົ່ານີ້ກໍບໍ່ຖືເອົາຝ່າຍທີ 3 ໃດໆເປັນເປົ້າໝາຍ ແຕ່ຈະນຳເອົາຄວາມສົມສ່ວນມາສູ່ໂລກເປັນສຳຄັນ, ຈາກນີ້ ທັງສອງປະເທດພວກເຮົາບໍ່ໄດ້ເປັນພັນທະມິດທາງການທະຫານຢ່າງຜູກຂາດ.
ທ່ານນີນີສໂຕ ກ່າວວ່າ: ນີ້ບໍ່ແມ່ນການຊ້ອມຮົບຮ່ວມທາງທະເລຄັ້ງທຳອິດຂອງຈີນ ແລະ ຣັດເຊຍ ແລະຜ່ານມາກອງທັບເຮືອຈີນກໍເຄີຍສົ່ງກຳປັ່ນຮົບໄປຊ້ອມຮົບຢູ່ເຂດທະເລເມດີແຕຣາເນ. ຂະນະທີ່ປະເທດຕົນກໍຈະຊ້ອມຮົບຮ່ວມກັບຊູແອັດ ແລະ ອາເມລິກາ ຢູ່ເຂດທະເລບານຕິກເຊັ່ນດຽວກັນ ແລະການຊ້ອມຮົບເຫຼົ່ານີ້ກໍບໍ່ໝາຍຄວາມວ່າຈະຕ້ອງເປັນພັນທະມິດທາງການທະຫານຢ່າງຜູກຂາດແຕ່ປະການໃດ.
