ວັນທີ 27 ກໍລະກົດນີ້, ທ່ານອັນໂຕນີ ກູເທີເຣສ໌ ເລຂາທິການໃຫຍ່ອົງການສະຫະປະຊາຊາດໄດ້ອອກຖະແຫຼງການຜ່ານໂຄສົກຂອງທ່ານ ເພື່ອສະແດງຄວາມຊົມເຊີຍທີ່ສະຖານະການຢູ່ເຂດເມືອງເກົ່າເຢລູຊາແລັມຫຼຸດຜ່ອນລົງ.
ທ່ານກູເທີເຣສ໌ກ່າວໂດຍຫວັງໃຫ້ບັນດາຝ່າຍຮັກສາການປຶກສາຫາລືກັນ, ສ້າງບັນຍາກາດທີ່ໄວ້ເນື້ອເຊື່ອໃຈກັນ ແລະຕົນກໍຈະຮັກສາການຕິດຕໍ່ພົວພັນກັບບັນດາຝ່າຍ.
ວັນທີ 14 ກໍລະກົດນີ້, ຫຼັງຈາກເຈົ້າໜ້າທີ່ຕຳຫຼວດອິສລາແອນ 2 ຄົນຖືກຍິງເສຍຊີວິດຢູ່ພູສັກສິດເຢລູຊາແລັມ. ອິສລາແອນກໍໄດ້ຕິດຕັ້ງເຄື່ອງກວດວັດຖຸຢູ່ປາກທາງເຂົ້າວັດພູ ເຊິ່ງເຮັດໃຫ້ຊາວປາແລສຕິນປະທ້ວງ ແລະເກີດການປະທະກັນລະຫວ່າງສອງຝ່າຍເຮັດໃຫ້ຢ່າງໜ້ອຍມີຜູ້ເສຍຊີວິດ 10 ຄົນ ແລະບາດເຈັບ 500 ກວ່າຄົນ. ໃນວັນທີ 25 ເດືອນດຽວກັນ, ຄະນະຄວາມໝັ້ນຄົງອິສລາແອນໄດ້ຕົກລົງຍົກເລີກເຄື່ອງກວດດັ່ງກ່າວ ແລະຖັດມາ 2 ມື້ຄືວັນທີ 27, ທ່ານມູຮາເມັດ ອາມັດ ຮູເຊອິນ ຜູ້ນຳຝ່າຍສາສະໜາອິສລາມເຢລູຊາແລັມກໍໄດ້ອອກມາປະກາດວ່າ, ຂະບວນການຕໍ່ຕ້ານມາດຕະການເພີ່ມມາດຕະການກວດກາຄວາມປອດໄພຢູ່ວັດພູຂອງຊາວມຸສລິມໄດ້ສິ້ນສຸດລົງແລ້ວ.
 |
