ປີ 2017 ແມ່ນປີຮ່ວມມືທາງການທ່ອງທ່ຽວຈີນອາຊຽນ, ຈີນແລະບັນດາປະເທດໃນອາຊຽນຖືໂອກາດນີ້ຮ່ວມກັນສ້າງເວທີຮ່ວມມືການທ່ອງທ່ຽວຕ່າງໆ, ຊຸກຍູ້ການຮ່ວມມືດ້ານການທ່ອງທ່ຽວລະຫວ່າງສອງຝ່າຍກ້າວໄປສູ່ການມີຂະໜາດໃຫຍ່ກວ່າເກົ່າ, ຂົງເຂດກວ້າງຂວາງກວ່າເກົ່າແລະລະດັບສູງກວ່າເກົ່າ, ບຸກເບີກ "ເສດຖະກິດສວຍງາມ".
ທ່ານນາງຢາງຊິ້ວພິງ ເລຂາທິການໃຫຍ່ສູນຈີນ-ອາຊຽນໄດ້ໃຫ້ສຳພາດຕໍ່ນັກຂ່າວຫວ່າງມໍ່ໆນີ້ວ່າ, ບັນດາປະເທດໃນພາກພື້ນພວມປັບປຸງກົນໄກຮ່ວມມືແລະລົງເລິກການຮ່ວມມືດ້ານການທ່ອງທ່ຽວໂດຍຜ່ານການສ້າງເວທີແລກປ່ຽນແລະຮ່ວມມືຕ່າງໆ. ຂະນະທີ່ສູນຈີນ-ອາຊຽນພວມສຸມໃສ່ການສ້າງເວທີຮ່ວມມືການທ່ອງທ່ຽວຈີນ-ອາຊຽນ, ເພື່ອໂຄສະນາຊັບພະຍາກອນທ່ອງທ່ຽວທີ່ມີຄຸນນະພາບຂອງຈີນແລະອາຊຽນ, ຊຸກຍູ້ອົງການທ່ອງທ່ຽວຂອງສອງຝ່າຍຕິດຕໍ່ກັນ, ຊຸກຍູ້ການປະດິດສ້າງໃໝ່ຜະລິດຕະພັນທ່ອງທ່ຽວ.
ຫວ່າງມໍ່ໆນີ້, ທ່ານນາງຢາງຢ້ຽນຢ້ຽນ ຮອງຫົວໜ້າກອງເລຂາງານວາງສະແດງສິນຄ້າຈີນອາຊຽນກ່າວວ່າ, ງານວາງສະແດງສິນຄ້າຈີນ-ອາຊຽນຈັດຂຶ້ນຢ່າງສຳເລັດຜົນ 13 ປີມານີ້, ໄດ້ພະຍາຍາມຊຸກຍູ້ການຮ່ວມມືດ້ານການທ່ອງທ່ຽວໃນພາກພື້ນມາໂດຍຕະຫຼອດ. ເລີ່ມແຕ່ປີ 2005 ເປັນຕົ້ນມາ, ງານວາສະແດງສິນຄ້າຈີນ-ອາຊຽນກໍ່ມີລາຍການ "ຕົວເມືອງທີ່ເຕັມໄປດ້ວຍມົນສະເໜ່" ໃນທຸກປີ, ໂດຍຈີນແລະບັນດາປະເທດໃນອາຊຽນໄດ້ເລືອກຕົວເມືອງທີ່ມີລັກສະນະຕົວແທນຂອງຕົນເປັນ "ຕົວເມືອງທີ່ເຕັມໄປດ້ວຍມົນສະເໜ່", ເພື່ອສະແດງການພັດທະນາແລະໂອກາດການຄ້າຂອງຕົວເມືອງແຫ່ງນີ້ໃນດ້ານການຄ້າ, ການລົງທຶນ, ວິທະຍາສາດເຕັກນິກ, ວັດທະນະທຳແລະການທ່ອງທ່ຽວເປັນຕົ້ນ.
ເວບໄຊການທ່ອງທ່ຽວທີ່ກ່ຽວຂ້ອງໄດ້ເປີດເຜີຍວ່າ, ໃນ7 ເດືອນຕົ້ນປີນີ້, ຄົນຈີນທີ່ໄປທ່ອງທ່ຽວຢູ່ອາຊີຕາເວັນອອກສຽງໃຕ້ໄດ້ເພີ່ມຂຶ້ນ 2,5 ເທົ່າເມື່ອທຽບໃສ່ ໄລຍະດຽວກັນປີຂອງປີຜ່ານມາ. ຈີນແລະອາຊຽນຕ່າງກາຍເປັນຈຸດໝາຍປາຍທາງການທ່ອງທ່ຽວແລະຕະຫຼາດນັກທ່ອງທ່ຽງໃຫຍ່ທີ່ສຸດຂອງແຕ່ລະຝ່າຍ.
