4ປະເທດຢ້ຳວ່າກາຕາຕ້ອງປະຕິບັດຕາມຄຳຮຽກຮ້ອງ 13 ຂໍ້

ອາຣັບບີຊາອຸດິດ, ເອຢິບ,ສະຫະອາຣັບເອມີເຣດແລະບາເຣນໄດ້ອອກຖະແຫຼງການໃນວັນທີ 30 ກໍລະກົດນີ້ໂດຍກ່າວຢ້ຳວ່າ ພຽງແຕ່ກາຕາປະຕິບັດຕາມຄຳຮຽກຮ້ອງ 13 ຂໍ້ເທົ່ານັ້ນທັງ 4 ປະເທດ ຈິ່ງຈະນັ່ງໂຕະເຈລະຈາ.

ທັງນີ້ໃນວັນທີ 5 ມິຖຸນາຜ່ານມາ, 4 ປະເທດເຊັ່ນອາຣັບບີຊາອຸດິດໄດ້ປະກາດຕັດສາຍພົວພັນທາງການທູດກັບກາຕາທັງປະຕິບັດມາດຕະການປິດລ້ອມໂດຍຫ້າມຂາຍສິນຄ້າຕາມຂໍ້ອ້າງທີ່ປະເທດດັ່ງກ່າວສະໜັບສະໜູນລັດທິກໍ່ການຮ້າຍແລະທຳລາຍຄວາມໝັ້ນຄົງໃນພາກພື້ນ. ຈາກນັ້ນກໍມີອີກຫຼາຍປະເທດໄດ້ປະກາດຕັດສາຍພົວພັນທາງການທູດກັບກາຕາ. ຂະນະທີ່ກະຊວງການຕ່າງປະເທດກາຕາກໍໄດ້ອອກຖະແຫຼງການ ໃນວັນທີ 5 ມິຖຸນາຜ່ານມາເຊັ່ນກັນໂດຍສະແດງຄວາມເສຍດາຍແລະ ຕົກໃຈທັງເຫັນວ່າມາດຕະການດັ່ງກ່າວ ບໍ່ມີເຫດຜົນແຕ່ປະການໃດ.