ວັນທີ 28 ກໍລະກົດນີ້, ສານຂັ້ນສູງຊາໂຄ ຊາອາລານປະເທດມາເລເຊຍໄດ້ຕົກລົງວ່າ: ເຫດການຊາຍ ສປປ ເກົາຫຼີທີ່ເສຍຊີວິດຢູ່ກົວລາລຳເປີເມື່ອເດືອນກຸມພາຜ່ານມາຈະເລີ່ມໄຕ່ສວນໃນວັນທີ 2 ຕຸລາປີນີ້.
ສານຂັ້ນສູງຊາໂຄ ຊາອາລານໄດ້ໄຕ່ຖາມຜູ້ຕ້ອງສົງໄສສອງຄົນ ຄື ນາງ ດວນທິເຮືອງ ອາຍຸ 28 ປີ ສັນຊາດຫວຽດນາມ ແລະ ນາງ ຊີຕີ ອາຍສ໌ຢາ ອາຍຸ 25 ປີ ສັນຊາດອິນໂດເນເຊຍ ໂດຍທັງສອງໄດ້ນຸ່ງເສື້ອກັນລູກປືນແລະຖືກສົ່ງໄປສານໃນເວລາ 8 ໂມງຂອງມື້ດັ່ງກ່າວ. ກ່ອນໜ້ານີ້, ຜູ້ຕ້ອງສົງໄສທັງສອງຄົນນີ້ໄດ້ຮັບການໄຕ່ສວນຢູ່ສານທ້ອງຖິ່ນຊີປາງປະເທດມາເລເຊຍແລ້ວ 3 ເທື່ອ ແລະສານທ້ອງຖິ່ນຊີປາງກໍໄດ້ປະກາດໃນວັນທີ 30 ພຶດສະພາຜ່ານມາວ່າຈະສົ່ງຄະດີດັ່ງກ່າວໃຫ້ສານຂັ້ນສູງຊາໂຄ ຊາອາລານພິຈາລະນາຕັດສິນ.
ໃນສຳນວນຄະດີຊີ້ໃຫ້ເຫັນວ່າ: ນາງ ດວນທິເຮືອງ ແລະ ນາງ ຊີຕີ ອາຍສ໌ຢາພ້ອມດ້ວຍພວກອີກ 4 ຄົນໄດ້ຖືກຮ້ອງຟ້ອງໃນຂໍ້ຫາສັງຫານທ້າວ ກິມຊອນ ອາຍຸ 45 ປີ ຢູ່ສະໜາມບິນສາກົນທີສອງກົວລາລຳເປີໃນວັນທີ 13 ກຸມພາຜ່ານມາແລະຖ້າເປັນຄວາມຈິງ,ຈະຖືກລົງໂທດປະຫານຊີວິດ.
 |
