"ງານວາງສະແດງມໍລະດົກວັດທະນະທຳຈີນທີ່ບໍ່ແມ່ນວັດຖຸ: ການສືບທອດແລະການປະດິດສ້າງ"ໄດ້ຈັດຂຶ້ນຢູ່ສຳນັກງານກະຊວງປ້ອງກັນປະເທດກຳປູເຈຍໃນວັນທີ 31 ກໍລະກົດຜ່ານມານັ້ນໄດ້ ເຮັດໃຫ້ນາຍແລະພົນທະຫານກຳປູເຈຍສາມາດສຳຜັດກັບມໍລະດົກວັດທະນະທຳທີ່ບໍ່ແມ່ນວັດຖຸທີ່ອຸດົມສົມບູນຂອງຈີນ.
ງານດັ່ງກ່າວໄດ້ນຳເອົາເຄື່ອງຫັດຖະກຳແສ່ວ,ຜົນງານສິລະປະການຕັດເຈ້ຍ, ຮູບປັ້ນແປ້ງໝີ່ແລະອື່ນໆມາວາງສະແດງ ເຊິ່ງມີນາຍແລະພົນທະຫານເປັນຈຳນວນຫຼາຍມາຊົມຢ່າງບໍ່ຂາດສາຍ. ຜູ້ຈັດງານຂອງຈີນໃຫ້ຮູ້ວ່າ: ງານວາງສະແດງເທື່ອນີ້ໄດ້ສະແດງໃຫ້ເຫັນຄວາມງາມຂອງຫັດຖະກຳມໍລະດົກວັດທະນະທຳທີ່ບໍ່ແມ່ນວັດຖຸພ້ອມສີມືທີ່ດີເລີດຂອງສິລະປິນຈີນແລະຫວັງຈະສົ່ງເສີມການແລກປ່ຽນດ້ານວັດທະນະທຳລະຫວ່າງສອງປະເທດແລະເພີ່ມຄວາມເຂົ້າໃຈນ້ຳໃຈມິດຕະພາບລະຫວ່າງປະຊາຊົນສອງຊາດ.
ກິດຈະກຳສັບປະດາວັດທະນະທຳທີ່ບໍ່ແມ່ນວັດຖຸຂອງຈີນໄດ້ຈັດຂຶ້ນໃນວັນທີ 25 ກໍລະກົດຜ່ານມາໂດຍໄດ້ມີການສະແດງສິລະປະວັນນະຄະດີ, ການວາງສະແດງຜົນງານສິລະປະວັດທະນະທຳທີ່ບໍ່ແມ່ນວັດຖຸຂອງຈີນ, ງານວາງສະແດງຮູບພາບ, ການສຳມະນາແລະກິດຈະກຳອື່ນໆ ເຊິ່ງດຳເນີນໄປເຖິງວັນທີ 2 ສິງຫານີ້.