ເຈົ້າໜ້າທີ່ຕຳຫຼວດຟີລິບປິນເປີດເຜີຍໃນວັນທີ 31 ກໍລະກົດຜ່ານມາວ່າ, ເມື່ອມໍ່ໆມານີ້, ໄດ້ພົບເຫັນຊາກສົບຂອງຄົນຕັດໄມ້ 7 ຄົນຢູ່ບາຊີລັນ ທາງພາກໃຕ້ຂອງປະເທດ. ຂະນະທີ່ກ່ອນໜ້ານີ້ພວກເຂົາຖືກກຸ່ມປະກອບອາວຸດອາບູຊາຢັຟທີ່ຕໍ່ຕ້ານລັດຖະບານລັກພາຕົວ.
ເຈົ້າໜ້າທີ່ຕຳຫຼວດກ່າວວ່າ, 7 ຄົນດັ່ງກ່າວຖືກກຸ່ມປະກອບອາວຸດອາບູຊາຢັຟລັກພາຕົວຢູ່ສອງບ້ານເທິງເກາະບາຊີລັນ ໂດຍຕຳຫຼວດທ້ອງຖິ່ນພົບເຫັນຊາກສົບຂອງສອງພໍ່ລູກໃນວັນທີ 29 ກໍລະກົດ ແລະພົບອີກ 5 ສົບໃນວັນທີ 30 ເດືອນດຽວກັນ.
ກຸ່ມປະກອບອາວຸດອາບູຊາຢັຟສ້າງຕັ້ງຂຶ້ນເມື່ອຊຸມປີ 1990 ເຊິ່ງເປົ້າໝາຍຕົ້ນຕໍເຄື່ອນໄຫວຢູ່ພາກໃຕ້ຟີລິບປິນ ແລະກໍ່ເຫດໂຈມຕີແລະລັກພາຕົວມາຫຼາຍເທື່ອແລ້ວ. ຂະນະທີ່ເຈົ້າໜ້າທີ່ທະຫານຟີລິບປິນກ່າວວ່າ, ກຸ່ມດັ່ງກ່າວໄດ້ຈົ່ງຮັກພັກດີຕໍ່ກຸ່ມຫົວຮຸນແຮງ "ລັດອິສລາມ" ຫຼື IS.