ວັນທີ 31 ກໍລະກົດຜ່ານມາ, ທ່ານ ຊີປູ້ ເອກອັກຄະລັດຖະທູດຈີນປະຈຳອາຊຽນ ໄດ້ພົບປະກັບທ່ານນາງ ມາຣີ ເອນກາ ປັນເກສຕູ ອະດີດລັດຖະມົນຕີກະຊວງການຄ້າ, ກຳມະການຄະນະບໍລິຫານສູນຄົ້ນຄວ້າບັນຫາຍຸດທະສາດແລະສາກົນຂອງອິນໂດເນເຊຍ ໂດຍສອງຝ່າຍໄດ້ແລກປ່ຽນຄວາມຄິດເຫັນກ່ຽວກັບການພົວພັນຄູ່ຮ່ວມເສດຖະກິດຮອບດ້ານໃນພາກພື້ນ ຫຼື RCEP ເປັນຕົ້ນຕໍ.
ໂອກາດດັ່ງກ່າວ, ທ່ານນາງ ມາຣີ ເອນກາ ປັນເກສຕູ ກ່າວວ່າ, ການເຈລະຈາ RCEP ໄດ້ຈັດຂຶ້ນ 19 ເທື່ອແລ້ວ, ແຕ່ກໍຍັງບໍ່ທັນກ້າວໄປເຖິງຄວາມເປັນເອກະພາບກັນ, ຂະນະທີ່ ສູນຄົ້ນຄວ້າບັນຫາຍຸດທະສາດແລະສາກົນຂອງອິນໂດເນເຊຍ ພວມແລກປ່ຽນຄວາມເຫັນກັບປະເທດສະມາຊິກອາຊຽນແລະປະເທດຄູ່ເຈລະຈາໂດຍຜ່ານສອງຊ່ອງທາງ ໂດຍຫວັງວ່າຈະສະທ້ອນຕໍ່ຫຼັກໝັ້ນຂອງລັດຖະບານປະເທດທີ່ກ່ຽວຂ້ອງ ເພື່ອພະຍາຍາມເຮັດໃຫ້ການເຈລະຈາດັ່ງກ່າວສຳເລັດພາຍໃນປີນີ້.
ທ່ານ ຊີປູ້ ກ່າວວ່າ, ປັດຈຸບັນ, ການເຈລະຈາ RCEP ໄດ້ປະສົບຄວາມຫຍຸ້ງຍາກ ເຊິ່ງມີຫຼາຍສາເຫດ. ໃນຖານະເປັນຜູ້ລິເລີ່ມ, ອາຊຽນເປັນກຳລັງຕົ້ນຕໍໃນການຊຸກຍູ້ໃຫ້ການເຈລະຈາດັ່ງກ່າວມີຄວາມຄືບໜ້າ. ຂະນະດຽວກັນ, ອິນໂດເນເຊຍເປັນປະເທດໃຫຍ່ທີ່ສຸດໃນອາຊຽນ ຈຶ່ງຄວນຕັ້ງໜ້າເສີມຂະຫຍາຍບົດບາດໃນຂະບວນການເຈລະຈາໃຫ້ຫຼາຍກວ່າເກົ່າ ແລະສູນຄົ້ນຄວ້າບັນຫາຍຸດທະສາດແລະສາກົນ ເປັນຄັງປັນຍາທີ່ສຳຄັນຂອງອິນໂດເນເຊຍ ເຊິ່ງຫວັງວ່າ ທັງສອງຊ່ອງທາງນີ້ຈະສາມາດຊຸກຍູ້ການເຈລະຈາ RCEP ໄດ້ເປັນຢ່າງດີ.