ຟິລິບປິນເພີ່ມທະວີການປ້ອງກັນຄວາມສະຫງົບເພື່ອກອງປະຊຸມອາຊຽນ

    ເຈົ້າໜ້າທີ່ຕຳຫຼວດຟິລິບປິນ ຖະແຫຼງໃນວັນທີ 1 ສິງຫານີ້ວ່າ, ໄດ້ຈັດວາງຕຳຫຼວດຫຼາຍກວ່າ 13.000 ຄົນຢູ່ນະຄອນຫຼວງມນະນີລາ ແລະຈະໃຊ້ມາດຕະການຄວບຄຸມຢ່າງໃກ້ຊິດ ເພື່ອຮັບປະກັນໃຫ້ແກ່ການໄຂກອງປະຊຸມຕ່າງໆຂອງອາຊຽນ.

    ໃນຖານະເປັນປະເທດປະທານໝູນວຽນຂອງອາຊຽນ, ຟິລິບປິນຈະຈັດກອງປະຊຸມລັດຖະມົນຕີການຕ່າງປະເທດອາຊຽນ, ກອງປະຊຸມລັດຖະມົນຕີການຕ່າງປະເທດອາຊຽນແລະຈີນ, ຍີ່ປຸ່ນ, ສ.ເກົາຫຼີ ຫຼື 10+3, ກອງປະຊຸມລັດຖະມົນຕີການຕ່າງປະເທດຂອງກອງປະຊຸມສຸດຍອດອາຊີຕາເວັນອອກ, ເວທີປຶກສາຫາລືພາກພື້ນອາຊຽນ ແລະກອງປະຊຸມອື່ນໆ ແລະຍັງຈະຈັດພິທີສະຫຼອງວັນສ້າງຕັ້ງອາຊຽນຄົບຮອບ 50 ປີນຳອີກ.

    ເຈົ້າໜ້າທີ່ຕຳຫຼວດ ກ່າວວ່າ, ປັດຈຸບັນ ຍັງບໍ່ທັນພົບການຂົ່ມຂູ່ໃດໆທີ່ແນໃສ່ກອງປະຊຸມຕ່າງໆຂອງອາຊຽນ, ແຕ່ແນວໃດກໍຕາມ, ຍັງຈະໃຊ້ມາດຕະການຕິດຕາມຄວບຄຸມຢ່າງໃກ້ຊິດຕໍ່ບາງກຸ່ມໃນບາງເຂດ ເພື່ອປ້ອງກັນບໍ່ໃຫ້ເກີດເຫດການໃດໆທີ່ຈະຂົ່ມຂູ່ຕໍ່ກອງປະຊຸມຕ່າງໆ.