ວັນທີ 3 ສິງຫານີ້ ຢູ່ນະຄອນຫຼວງປັກກິ່ງ, ທ່ານວາງຢີ້ ລັດຖະມົນຕີກະຊວງການຕ່າງປະເທດຈີນໄດ້ພົບປະກັບທ່ານເມບລຸດ ກາວູໂຊກລູ ລັດຖະມົນຕີກະຊວງການຕ່າງປະເທດຕວກກີ.
ທ່ານວາງຢີ້ກ່າວວ່າ, ການຮ່ວມກັນສ້າງ "ໜຶ່ງແລວທາງໜຶ່ງເສັ້ນທາງ" ສອດຄ່ອງກັບຜົນປະໂຫຍດຮ່ວມຂອງຈີນແລະຕວກກີທີ່ສຸດ ເຊິ່ງຈີນສະແດງຄວາມຊົມເຊີຍສູງທີ່ທ່ານປະທານາທິບໍດີເອີໂດກັນມາເຂົ້າຮ່ວມກອງປະຊຸມເວທີປຶກສາຫາລືສຸດຍອດການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ" ທີ່ຈັດຂຶ້ນຢູ່ນະຄອນຫຼວງປັກກິ່ງ ແລະຂອບໃຈຕວກກີທີ່ໄດ້ປະກອບສ່ວນຕໍ່ກອງປະຊຸມດັ່ງກ່າວ.
ທ່ານວາງຢີ້ກ່າວຕື່ມວ່າ, ຕວກກີເປັນຈຸດສຳຄັນໃນ "ໜຶ່ງແລວທາງໜຶ່ງເສັ້ນທາງ" ມາໂດຍຕະຫຼອດ, ບໍ່ວ່າໃນປະຫວັດສາດ ຫຼືປັດຈຸບັນ, ບໍ່ວ່າຢູ່ທາງບົກຫຼືທາງທະເລ. ຈາກນີ້ຈີນຈິ່ງຍິນດີຮ່ວມກັບຕວກກີ, ສົ່ງເສີມຈິດໃຈ "ເສັ້ນທາງສາຍໄໝ" ບູຮານ ແລະເພີ່ມຕື່ມເນື້ອໃນຍຸກໃໝ່, ຮ່ວມກັນຂຸດຄົ້ນຄວາມສາມາດບົ່ມຊ້ອນໃໝ່ໃນຂະບວນການຮ່ວມກັນຊຸກຍູ້ "ໜຶ່ງແລວທາງໜຶ່ງເສັ້ນທາງ", ເປີດກວ້າງທິດທາງການຮ່ວມມືໃໝ່ ເພື່ອເຮັດໃຫ້ຈີນແລະຕວກກີຕ່າງຝ່າຍຕ່າງໄດ້ຮັບຜົນປະໂຫຍດ ແລະບັນລຸການພັດທະນາຮ່ວມກັນ.
 |
