ເຈົ້າໜ້າທີ່ທຳນຽບປະທານາທິບໍດີປາແລສຕິນອອກຖະແຫຼງການ ໂດຍປະນາມທ່ານເບນຈາມິນ ເນຕັນຢາຮູ ນາຍົກລັດຖະມົນຕີອິສລາແອນທີ່ເຂົ້າຮ່ວມວາງສີລາລືກໃຫ້ແກ່ການສ້າງຈຸດຕັ້ງຖິ່ນຖານຊາວຢິວຢູ່ຝັ່ງຕາເວັນຕົກແມ່ນ້ຳຈໍແດນໃນວັນທີ 3 ສິງຫານີ້ ໂດຍເນັ້ນວ່າ ການກະທຳດັ່ງກ່າວຈະທຳລາຍ "ແຜນການສ້າງສອງປະເທດ" ແລະຮຽກຮ້ອງໃຫ້ອາເມລິກາເຂົ້າໄກ່ເກ່ຍ ເພື່ອສະກັດກັ້ນການຂະຫຍາຍຈຸດຕັ້ງຖິ່ນຖານຂອງຊາວຢິວຢູ່ດິນແດນປາແລສຕິນທີ່ອິສລາແອນຍຶດຄອງ.
ສື່ມວນຊົນລາຍງານວ່າ, ລັດຖະບານອິສລາແອນກຽມຈະສ້າງອາພາດເມັນ 1000 ກວ່າຊຸດຢູ່ເມືອງໄບຕາ ອີລິດ ຈຸດຕັ້ງຖິ່ນຖານຊາວຢິວໃຫຍ່ອັນດັບ 2 ຢູ່ຝັ່ງຕາເວັນຕົກແມ່ນ້ຳຈໍແດນ ແລະໃນໂອກາດທ່ານເນຕັນຢາຮູເຂົ້າຮ່ວມພິທີວາງສີລາລືກໂຄງການດັ່ງກ່າວໃນວັນທີ 3 ສິງຫານັ້ນ ທ່ານໄດ້ກ່າວວ່າ ຈະບໍ່ມີລັດຖະບານຊຸດໃດໄດ້ປະກອບສ່ວນຂະຫຍາຍຈຸດຕັ້ງຖິ່ນຖານຫຼາຍກວ່າລັດຖະບານຕົນ ຢູ່ດິນແດນອິສລາແອນ.
 |
