ກອງປະຊຸມລັດຖະມົນຕີການຕ່າງປະເທດອາຊຽນຄັ້ງທີ50ໄດ້ຈັດຂຶ້ນຢູ່ນະຄອນຫຼວງມານີລາປະເທດຟິລິບປິນໃນວັນທີ5ສິງຫານີ້. ລັດຖະມົນຕີການຕ່າງປະເທດຂອງບັນດາປະເທດໃນອາຊຽນ, ລັດຖະມົນຕີການຕ່າງປະເທດຂອງປາປົວນິວກີເນ, ສະວິສ, ຕີມໍເລັສເຕ, ຕວກກີແລະເຈົ້າໜ້າທີ່ອື່ນໆໄດ້ເຂົ້າຮ່ວມພິທີເປີດກອງປະຊຸມ.
ໃນເວລາປະກອບຄຳເຫັນໃນພິທີເປີດ, ທ່ານອາລັນ ກາເຢຕາໂນ, ລັດຖະມົນຕີການຕ່າງປະເທດຟິລິບປິນ ປະເທດປະທານໝູນວຽນຂອງອາຊຽນໄດ້ແນະນຳ ທີ່ມາການສ້າງຕັ້ງ ແລະເປົ້າໝາຍການພັດທະນາຂອງອາຊຽນ. ທ່ານກ່າວວ່າ, ອາຊຽນພວມອອກແຮງເພີ່ມທະວີການສົນທະນາແລະການຮ່ວມມືກັບປະເທດສຳຄັນຕ່າງໆໃນໂລກ ເຊິ່ງລວມທັງ ຈີນ, ອາເມລິກາ ແລະການາດາເປັນຕົ້ນ ພ້ອມດ້ວຍອົງການຈັດຕັ້ງສາກົນຕ່າງໆ; ຖ້າຖືອາຊຽນເປັນກຸ່ມເສດຖະກິດອິດສະຫຼະ, ປັດຈຸບັນຈັງຫວະເຕີບໂຕດ້ານGDPພຽງແຕ່ຮອງຈາກຈີນແລະອິນເດຍເທົ່ານັ້ນ; ກົນໄກປະສານງານວຽກງານພາຍໃນອາຊຽນກໍນັບມື້ນັບສົມບູນຂຶ້ນ, ຄວາມສາມາດໃນການແກ້ໄຂບັນຫາກໍດີຂຶ້ນເປັນກ້າວໆ.
ລັດຖະມົນຕີການຕ່າງປະເທດຂອງປະເທດຕ່າງໆທີ່ເຂົ້າຮ່ວມກອງປະຊຸມຈະແລກປ່ຽນຄຳຄິດຄຳເຫັນກ່ຽວກັບຫົວຂໍ້ສຳຄັນໃນສາກົນແລະພາກພື້ນ ກໍຄືຫົວຂໍ້ອື່ນໆທີ່ສົນໃຈຮ່ວມກັນ, ໂດຍສະເພາະແມ່ນບັນຫາຄວາມໝັ້ນຄົງ ແລະການພັດທະນາເສດຖະກິດຂອງພາກພື້ນ.