ໄຂກອງປະຊຸມລັດຖະມົນຕີການຕ່າງປະເທດອາຊຽນຄັ້ງທີ 50 ຢ່າງເປັນທາງການ
2017-08-06 16:25:29 cri
ຕາມຂ່າວ CRI: ກອງປະຊຸມລັດຖະມົນຕີການຕ່າງປະເທດອາຊຽນຄັ້ງທີ 50 ໄດ້ໄຂຂຶ້ນຢູ່ນະຄອນຫຼວງມະນີລາ ປະເທດຟີລິບປີນຢ່າງເປັນທາງການໃນຕອນເຊົ້າວັນທີ 5 ສິງຫານີ້, ລັດຖະມົນຕີກະຊວງການຕ່າງປະເທດຂອງ 10 ປະເທດອາຊຽນຮ່ວມກັນເຂົ້າຮ່ວມພິທີໄຂປະຊຸມ. ໂດຍເນັ້ນຫົວຂໍ້ວ່າ "ກອບການປ່ຽນແປງໃໝ່ແລະເຊື່ອມໂຍງເຂົ້າສູ່ໂລກ". ລົດຖະມົນຕີການຕ່າງປະເທດບັນດາທ່ານທີ່ຮ່ວມປະຊຸມໄດ້ຮ່ວມກັນຫວນຄືນຂະບວນການກໍ່ສ້າງປະຊາຄົມອາຊຽນແລະທິດທາງພັດທະນາໃນອະນາຄົດ, ແລະໄດ້ແລກປ່ຽນຄວາມເຫັນກ່ຽວກັບບັນຫາພາກພື້ນແລະສາກົນທີ່ສົນໃຈຮ່ວມກັນ.
ປີ 2017 ແມ່ນອາຊຽນສ້າງຕັ້ງຂຶ້ນຄົບຮອບ 50 ປີ, ໃນໂອກາດກ່າວປາໄສໃນພິທີໄຂກອງປະຊຸມ, ທ່ານອາລັນ ປີເຕີ ຄາເຢທະໂນ ລັດຖະມົນຕີກະຊວງການຕ່າງປະເທດຟີລິບປີນທີ່ເປັນປະເທດປະທານໝູນວຽນຂອງອາຊຽນໄດ້ທົບທວນຄືນປະຫວັດສາດຂອງອາຊຽນແລະໄດ້ກ່າວຢ້ຳຄວາມຕັດສິນໃຈຂອງອາຊຽນກ່ຽວກັບການຮັກສາຄວາມສະຫງົບແລະຄວາມຈະເລີນຮຸ່ນເຮືອງຂອງພາກພື້ນ.
ຫຼັງກອງປະຊຸມລັດຖະມົນຕີການຕ່າງປະເທດອາຊຽນສິ້ນສຸດລົງ, ເລີ່ມແຕ່ວັນທີ 6 ສິງຫານີ້, ຈະຈັດກອງປະຊຸມລັດຖະມົນຕີກະຊວງການຕ່າງປະເທດຈີນ-ອາຊຽນ, ລັດຖະມົນຕີກະຊວງການຕ່າງປະເທດອາຊຽນ ຈີນ ຍີ່ປຸ່ນແລະສເກົາຫຼີ, ລັດຖະມົນຕີກະຊວງການຕ່າງປະເທດຂອງກອງປະຊຸມສຸດຍອດອາຊີຕາເວັນອອກ, ກອງປະຊຸມລັດຖະມົນຕີກະຊວງການຕ່າງປະເທດຂອງເວທີປຶກສາຫາລືອາຊຽນແລະກອງປະຊຸມອື່ນໆໂດຍທ່ານຫວາງຢີ້ ລັດຖະມົນຕີກະຊວງການຕ່າງປະເທດຈີນຈະເຂົ້າຮ່ວມ.
