ວັນທີ 6 ສິງຫານີ້, ທ່ານເຫີລີ້ເຟິ່ງ ປະທານຄະນະກຳມະການພັດທະນາແລະປະຕິຮູບແຫ່ງລັດຈີນ, ທູດພິເສດຂອງທ່ານສີຈິ້ນຜິງ ປະທານປະເທດຈີນໄດ້ເຂົ້າຢ້ຽມຄຳນັບທ່ານຮາຊັນ ຣູຮານີ ປະທານາທິບໍດີອີຣານທີ່ທຳນຽບປະທານາທິບໍດີ.
ໂອກາດັ່ງກ່າວ, ທ່ານເຫີລີ້ເຟິ່ງໄດ້ນຳເອົາຄວາມຊົມເຊີຍຂອງທ່ານປະທານສີຈິ້ນຜິງຫຼັງທ່ານຣູຮານີໄດ້ຮັບເລືອກຕັ້ງເປັນປະທານາທິບໍດີອີກວາລະໜຶ່ງໂດຍຢືນຢັນວ່າ ຈີນຍິນດີຮັກສາການໄປມາຫາສູ່ກັນກັບການນຳຂັ້ນສູງຂອງອີຣານ, ລົງເລິກການຮ່ວມມືສອງຝ່າຍທີ່ແທດເໝາະກັບຕົວຈິງພາຍໃຕ້ຂອບ "ໜຶ່ງແລວທາງໜຶ່ງເສັ້ນທາງ", ເພີ່ມທະວີການສະໜັບສະໜູນ ໃນບັນຫາທີ່ກ່ຽວພັນເຖິງຜົນປະໂຫຍດໃຈກາງຂອງກັນແລະກັນ ພ້ອມທັງຕິດຕໍ່ພົວພັນແລະປະສານສົມທົບກັນໃນວຽກງານສາກົນແລະພາກພື້ນເພື່ອເສີມສ້າງສາຍພົວພັນຄູ່ຮ່ວມຍຸດທະສາດຮອບດ້ານຈີນ-ອີຣານໃຫ້ອຸດົມສົມບູນຂຶ້ນຢ່າງບໍ່ຢຸດຢັ້ງ.
ທ່ານຣູຮານີຂອບໃຈຕໍ່ທ່ານປະທານສີຈິ້ນຜິງທີ່ໄດ້ແຕ່ງຕັ້ງທູດພິເສດມາເຂົ້າຮ່ວມພິທີສາບານຕົວຂຶ້ນຮັບຕຳແໜ່ງຂອງຕົນທັງຢືນຢັນວ່າ ອີຣານໃຫ້ຄວາມສຳຄັນສູງຕໍ່ການເສີມຂະຫຍາຍສາຍພົວພັນອີຣານ-ຈີນ ແລະຖືຈີນເປັນທິດທາງບູລິມະສິດໃນນະໂຍບາຍການຕ່າງປະເທດຂອງປະເທດຕົນມາໂດຍຕະຫຼອດ. ຂະນະດຽວກັນກໍຍິນດີຮ່ວມກັບຈີນເຊື່ອມຕໍ່ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ",ຊຸກຍູ້ການຮ່ວມມືຮອບດ້ານທີ່ແທດເໝາະກັບຕົວຈິງໃນຂົງເຂດຕ່າງໆລະຫວ່າງສອງປະເທດໃຫ້ມີຄຸນນະພາບແລະປະສິດທິພາບສູງຂຶ້ນເພື່ອສ້າງຄວາມສົມບູນພູນສຸກໃຫ້ປະຊາຊົນສອງຊາດຫຼາຍຂຶ້ນກວ່າເກົ່າ.
 |
