ວັນທີ 6 ສິງຫານີ້, ທ່ານຫວາງຢີ້ ລັດຖະມົນຕີກະຊວງການຕ່າງປະເທດຈີນ ໄດ້ພົບປະກັບທ່ານເຊີເກ ລາວຼົຟ ລັດຖະມົນຕີກະຊວງການຕ່າງປະເທດຣັດເຊຍ ຂະນະເຂົ້າຮ່ວມບັນດາກອງປະຊຸມລັດຖະມົນຕີການຕ່າງປະເທດຂອງການຮ່ວມມືອາຊີຕາເວັນອອກ.
ທ່ານຫວາງຢີ້ ກ່າວວ່າ: ສາຍພົວພັນລະຫວ່າງຈີນແລະຣັດເຊຍໄດ້ພັດທະນາເປັນຢ່າງດີ ໂດຍໃນເດືອນກໍລະກົດຜ່ານມາ, ທ່ານສີຈິ້ນຜິງ ປະທານປະເທດຈີນໄດ້ຢ້ຽມຢາມຣັດເຊຍທາງລັດຖະກິດຢ່າງປະສົບຜົນສຳເລັດອັນຈົບງາມ ແລະໄດ້ຮັບໝາກຜົນເປັນປະຫວັດສາດ ເຊິ່ງບໍ່ພຽງແຕ່ໄດ້ຊຸກຍູ້ການຮ່ວມມືທາງຍຸດທະສາດລະຫວ່າງສອງປະເທດເຂົ້າສູ່ລວງເລິກເທົ່ານັ້ນ, ແຕ່ຍັງໄດ້ເປັນເອກະພາບຮຽກຮ້ອງໃຫ້ຊຸກຍູ້ສ້າງສັນຕິພາບ ແລະ ສະຖຽນລະພາບໃນສາກົນອີກດ້ວຍ. ຈີນຍິນດີປະສານສົມທົບກັບຣັດເຊຍຢ່າງແໜ້ນແຟ້ນ ເພື່ອກະກຽມຄວາມພ້ອມໃຫ້ແກ່ການພົບປະອື່ນໆ ຂອງປະມຸກລັດສອງປະເທດ ແລະ ເພີ່ມທະວີການຮ່ວມມືໃນຂອບປະເທດບຣິກສ໌.
ທ່ານລາວຼົຟ ເຫັນດີຕໍ່ການຕີລາຄາສູງຕໍ່ສາຍພົວພັນລະຫວ່າງສອງປະເທດຂອງທ່ານຫວາງຢີ້ ແລະກ່າວວ່າ: ປະມຸກລັດສອງປະເທດມີການພົວພັນຢ່າງສະໜິດແໜ້ນ ແລະທ່ານປະທານາທິບໍດີວະລາດີເມຍ ປູຕິນ ກໍຈະເດີນທາງເຂົ້າຮ່ວມກອງປະຊຸມພົບປະລະຫວ່າງຜູ້ນຳປະເທດບຣິກສ໌ທີ່ຈະຈັດຂຶ້ນຢູ່ເມືອງເຊ້ຍເໝິນ ສປ ຈີນໃນເດືອນກັນຍາໜ້ານີ້, ຂະນະທີ່ຣັດເຊຍຈະພະຍາຍາມສະໜັບສະໜູນການຈັດກອງປະຊຸມດັ່ງກ່າວໃຫ້ປະສົບຜົນສຳເລັດຢ່າງຈົບງາມ.