ເຂດມົງໂກໃນ ເຊິ່ງເປັນເຂດປົກຄອງຕົນເອງຊົນເຜົ່າລະດັບແຂວງແຫ່ງທຳອິດຂອງຈີນໄດ້ຈັດພິທີສະຫຼອງວັນສ້າງຕັ້ງຄົບຮອບ 70 ປີ ໃນວັນທີ 8 ສິງຫານີ້ ໂດຍໃນພິທີທີ່ມີຄວາມໝາຍສຳຄັນນີ້, ທ່ານຢູເຈິ້ງເຊິງຫົວໜ້າຄະນະຜູ້ແທນສູນກາງຈີນໄດ້ກ່າວປາໄສ ໂດຍເນັ້ນວ່າ, ລະບົບຊົນເຜົ່າປົກຄອງໃນທ້ອງຖິ່ນຕ່າງໆໃນທົ່ວປະເທດເປັນລະບົບການເມືອງພື້ນຖານຂອງຈີນ ແລະກໍແມ່ນເນື້ອໃນສຳຄັນແລະເປັນສິ່ງຮັບປະກັນ ເພື່ອແກ້ໄຂບັນຫາຊົນເຜົ່າຢ່າງຖືກຕ້ອງ ຕາມສີສັນພິເສດຂອງຈີນ. ຈາກນີ້ ເຂດປົກຄອງຕົນເອງມົງໂກໃນຄວນເສີມຂະຫຍາຍບົດບາດສຳຄັນຂອງລະບົບນີ້ຕື່ມອີກ ເພື່ອປົກປ້ອງຜົນປະໂຫຍດທີ່ເປັນຮາກເຫງົ້າຂອງປະຊາຊົນບັນດາເຜົ່າ.
ຜູ້ແທນຊົນເຜົ່າຕ່າງໆແລະວົງການຕ່າງໆຂອງເຂດມົງໂກໃນຫຼາຍກວ່າ 1 ໝື່ນ 2 ພັນຄົນໄດ້ເຂົ້າຮ່ວມພິທີສະຫຼອງດັ່ງກ່າວ. ເຂດປົກຄອງຕົນເອງມົງໂກໃນ ສ້າງຕັ້ງຂຶ້ນເມື່ອປີ 1947 ແລະເປັນເຂດຊົນເຜົ່າປົກຄອງຕົນເອງລະດັບແຂວງແຫ່ງທຳອິດຂອງຈີນ ໂດຍປະກອບມີ 55 ຊົນເຜົ່າ ເຊັ່ນເຜົ່າມົງໂກນ, ຮັ້ນ, ແມນຈູ, ຫຸຍ ແລະອື່ນໆທີ່ໄດ້ຮ່ວມດຳລົງຊີວິດແລະທຳມາຫາກິນຢູ່ດິນແດນແຫ່ງນີ້ ດ້ວຍຄວາມສາມັກຄີປອງດອງຢ່າງໝັ້ນແກ່ນ.
