ຕາມຂ່າວCRI：ຕໍ່ກໍລະນີທີ່ທ່ານໂດນັນ ທຣຳ, ປະທານາທິບໍດີອາເມລິກາແລະລັດຖະບານ ສປປ ເກົາຫຼີປ່ຽນກັນຫວ່າມຖ້ອຍຄວາມຂົ່ມຂູ່ກໍ່ສົງຄາມ, ປະຊາຄົມໂລກກໍໃຫ້ຄວາມສົນໃຈໃນລະດັບສູງ, ໂດຍເຕືອນໃຫ້ອາເມລິກາແລະ ສປປ ເກົາຫຼີ ລະມັດລະວັງຕໍ່ກິລິຍາວາຈາຂອງຕົນ, ເພື່ອຫຼີກເວັ້ນບໍ່ໃຫ້ຮ້າຍແຮງຂຶ້ນຕື່ມ, ສະຖານະການຢ່າງເຄັ່ງຕຶງຂອງແຫຼມເກົາຫຼີນັບມື້ນັບຮຸນແຮງກວ່າເກົ່າ.
ວັນທີ 11 ສິງຫານີ້, ທ່ານອານໂດນີໂອ ກູເຕເຣສ, ເລຂາທິການໃຫຍ່ອົງການສະຫະປະຊາຊາດສະແດງທ່າທີໂດຍຜ່ານໂຄສົກຂອງຕົນວ່າ, ທ່ານຮູ້ສຶກເປັນຫ່ວງທີ່ສຸດຕໍ່ການຖົກຖຽງກັນລະຫວ່າງອາເມລິກາກັບ ສປປ ເກົາຫຼີ ຮຸນແຮງຂຶ້ນເລື້ອຍໆ, ທ່ານເຫັນວ່າວຽກງານດ່ວນທີ່ສຸດໃນປັດຈຸບັນແມ່ນຝ່າຍຕ່າງໆຄວນນຳໃຊ້ມາດຕະການ. ເພື່ອຜ່ອນຄາຍສະຖານະການທີ່ເຄັ່ງຕຶງຢູ່ແຫຼມເກົາຫຼີ. ທ່ານມີຄວາມຍິນດີຕໍ່ຂໍ້ລິເລີ່ມທັງໝົດທີ່ມີຜົນດີຕໍ່ການຜ່ອນຄາຍສະຖານະການທີ່ເຄັ່ງຕຶງ, ແລະຍິນດີໃຫ້ຟື້ນຟູຄວາມພະຍາຍາມທາງການຕ່າງປະເທດ.
ວັນທີ 11 ສິງຫານີ້, ທ່ານເຊີເກ ລາວຼົຟ, ລັດຖະມົນຕີກະຊວງການຕ່າງປະເທດຣັດເຊຍກ່າວສ່າ, ການຖົກຖຽງກັນລະຫວ່າງອາເມລິກາກັບ ສປປ ເກົາຫຼີ ໄດ້ເກີນຄວນແລ້ວ, ຣັດເຊຍຫວັງວ່າສອງຝ່າຍຈະຟື້ນຟູສະຕິຢ່າງເປັນປົກກະຕິ. ຣັດເຊຍແລະຈີນເຄີຍສະເໜີແຜນການຟື້ນຟູການເຈລະຈາກ່ຽວກັບບັນຫານິວເຄຼຍຢູ່ແຫຼມເກົາຫຼີແລະບາດກ້າວທຳອິດກໍແມ່ນ ຢຸດ 2 ການກະທຳ, ຄື: ສປປ ເກົາຫຼີ ຢຸດການຄົ້ນຄວ້າແລະພັດທະນານິວເຄຼຍທັງໝົດ, ສ່ວນອາເມລິກາແລະສ.ເກົາຫຼີ ຢຸດການຊ້ອມຮົບຮ່ວມຂະໜາດໃຫຍ່ທີ່ຖືເອົາ ສປປ ເກົາຫຼີເປັນເປົ້າໝາຍ, ເພື່ອສ້າງເງື່ອນໄຂໃຫ້ແກ່ການເລີ່ມຕົ້ນການເຈລະຈາລະຫວ່າງສອງຝ່າຍແລະບັນລຸການປອດນິວເຄຼຍຢູ່ແຫຼມເກົາຫຼີໃນສຸດທ້າຍ. ຖ້າວ່າຄວາມຂັດແຍ້ງລະຫວ່າງສອງຝ່າຍຮ້າຍແຮງຂຶ້ນເລື້ອຍໆຈົນເກີດສົງຄາມ, ຝ່າຍທີ່ມີກຳລັງແຂງແຮງກວ່າແລະມີສະຕິກວ່າຄວນຢວ່າງບາດກ້າວຫ່າງໄກກັບຄວາມອັນຕະລາຍກ່ອນ. ນອກນີ້, ທ່ານເຊີເກ ລາວຼົຟຍັງເນັ້ນວ່າ, ຣັດເຊຍບໍ່ຍອມຮັບ ສປປ ເກົາຫຼີ ເປັນປະເທດທີ່ມີອາວຸດນິວເຄຼຍ.
ວັນທີ 10 ສິງຫານີ້, ທ່ານປັກ ໂສ ຮຽນ, ໂຄສົກຊົງວາເດທຳນຽບປະທານາທິບໍດີ ສ.ເກົາຫຼີກ່າວວ່າ, ຢູ່ແຫຼມເກົາຫຼີເກີດສະຖານະການເຄັ່ງຕຶງແລະການປະທະກັນທາງການທະຫານຈະບໍ່ມີຜົນດີຕໍ່ປະເທດໃດໆ, ປະເທດຕົນຈະເພີ່ມທະວີການຮ່ວມມືກັບອາເມລິກາແລະປະເທດອື່ນໆທີ່ສຳຄັນ, ນຳໃຊ້ມາດຕະການທີ່ມີຄວາມຈຳເປັນເພື່ອຜ່ອນຄາຍສະຖານະການ, ປົກປັກຮັກສາສັນຕິພາບ. ແລະຈະພະຍາຍາມນຳໃຊ້ມາດຕະການທາງການຕ່າງປະເທດເພື່ອຜ່ອນຄາຍສະຖານະການທີ່ເຄັ່ງຕຶງ, ແລະເປີດປະຕູເຈລະຈາກັບ ສປປ ເກົາຫຼີ ໂດຍຕະຫຼອດ.
