ນັບແຕ່ເລີ່ມຕົ້ນກິດຈະກຳ "ນັກຂ່າວແພນດານ້ອຍ" ເກັບກຳຂ່າວຮອບໂລກ "ໜຶ່ງແລວທາງໜຶ່ງເສັ້ນທາງ" ເຊິ່ງເປັນກິດຈະກຳຜັດປ່ຽນເອົາຂ່າວສາທາລະນະປະໂຫຍດຂະໜາດໃຫຍ່ ເປັນຕົ້ນມາ, ທີມເຈິ້ງເຫີ ໄດ້ເປັນທີມສຳເລັດການທັດສະນະສຶກສາທີມທຳອິດ ແລະ ກັບຄືນເມືອງເສິງຕູ່ຈາກນະຄອນຫຼວງກົວລາລຳເປີໃນວັນທີ 11 ສິງຫານີ້ ຫຼັງໄດ້ທັດສະນະສຶກສາ 3 ຕົວເມືອງສຳຄັນຢູ່ຕາມເສັ້ນທາງສາຍໄໝທາງທະເລ ຄື ສິງກະໂປ, ມາລາກາ ແລະ ກົວລາລຳເປີ.
ຢູ່ສະຖານທູດຈີນປະຈຳມາເລເຊຍ, ນັກຂ່າວນ້ອຍ ໄດ້ຂໍຄວາມຮູ້ກ່ຽວກັບສະພາບການພັດທະນາການແລກປ່ຽນວັດທະນະທຳລະຫວ່າງຈີນແລະມາເລເຊຍນຳທ່ານຈ່າງເຈຊິ່ນ ຫົວໜ້າຫ້ອງການວັດທະນະທຳສະຖານທູດ. ຂະນະທີ່ທ່ານຈ່າງເຈຊິ່ນ ຢືນຢັນວ່າ: ກິດຈະກຳຕ່າງໆ ຄື ກິດຈະກຳ "ນັກຂ່າວແພນດານ້ອຍ" ນີ້ ໄດ້ຊຸກຍູ້ການແລກປ່ຽນລະຫວ່າງຊາວໜຸ່ມສອງປະເທດ. ແນວໃດກໍດີ, ຊາວໜຸ່ມກໍຄືອະນາຄົດ ແລະ ຄວາມຫວັງຂອງຊາດ ສະນັ້ນ, ກິດຈະກຳແລກປ່ຽນລະຫວ່າງຊາວໜຸ່ມ ຄື ກິດຈະກຳເທື່ອນີ້ ກໍສາມາດເສີມຂະຫຍາຍມິດຕະພາບລະຫວ່າງປະຊາຊົນສອງຊາດຈີນແລະມາເລເຊຍ.
ຢູ່ຫໍວັດທະນະທຳເຈິ້ງເຫີ ເມືອງມາລາກາ, "ນັກຂ່າວແພນດານ້ອຍ" ໄດ້ສຳນຶກຮູ້ເຖິງສະພາບທີ່ຍິ່ງໃຫຍ່ຂອງກອງເຮືອທີ່ໃຫຍ່ຫຼວງຂອງເຈິ້ງເຫີຂະນະເດີນທາງເຖິງເມືອງມາລາກາໃນສະໄໝນັ້ນ ຫຼັງໄດ້ຊົມງານວາງສະແດງວັດທະນະທຳ ແລະໄດ້ມອບຮູບແຕ້ມສີໝີແພນດາຈາກເສສວນໃຫ້ແກ່ຫໍວັດທະນະທຳເຈິ້ງເຫີ. ນອກນີ້, ນັກຂ່າວນ້ອຍໃນທີມເຈິ້ງເຫີ ຍັງແລກປ່ຽນກັບຄູແລະນັກຮຽນຂອງໂຮງຮຽນສອນພາສາຈີນຫຼາຍແຫ່ງຂອງສິງກະໂປ ແລະ ມາເລເຊຍນຳອີກ.
ກິດຈະກຳ "ນັກຂ່າວແພນດານ້ອຍ" ໄດ້ດຳເນີນໂດຍພາຍໃຕ້ການຊີ້ນຳຈາກໜ່ວຍຄົ້ນຄວ້າການພັດທະນາເສດຖະກິດແລະການເຜີຍແຜ່ວັດທະນະທຳ "ໜຶ່ງແລວທາງໜຶ່ງເສັ້ນທາງ" ກໍຄື ສູນພັດທະນາວັດທະນະທຳຄັງສະໝອງໂກຊິ່ນ ແລະການສະໜັບສະໜູນຈາກກົມຮ່ວມມືສາກົນ ອົງການການຂ່າວ, ພິມຈຳໜ່າຍ, ວິທະຍຸ ແລະ ໂທລະພາບແຫ່ງຊາດຈີນ ເພື່ອສ້າງພື້ນຖານສັງຄົມແຫ່ງການເຊື່ອມຄວາມສຳພັນໄມຕີຂອງປະຊາຊົນປະເທດຢູ່ລຽບຕາມ "ໜຶ່ງແລວທາງໜຶ່ງເສັ້ນທາງ" ໃຫ້ໜັກແໜ້ນ ແລະ ເພີ່ມທະວີການແລກປ່ຽນລະຫວ່າງຊາວໜຸ່ມຂອງປະເທດເຫຼົ່ານີ້.