ຕໍ່ກໍລະນີທີ່ທ່ານໂດນັນ ທຣຳ ປະທານາທິບໍດີອາເມລິກາ ຫວ່ານຖ້ອຍຄວາມໃນວັນທີ 11 ສິງຫານີ້ວ່າ ຈະບໍ່ປະຕິເສດການໃຊ້ການເຄື່ອນໄຫວທາງການທະຫານຕໍ່ເວເນຊຸເອລາ, ທ່ານວາລາດີເມຍ ພາດຣິໂນ ໂລເພັສ ລັດຖະມົນຕີປ້ອງກັນປະເທດເວເນຊຸເອລາກ່າວໃນມື້ດຽວກັນວ່າ, ກອງທັບປະເທດຕົນຈະເດັດດ່ຽວປົກປ້ອງອະທິປະໄຕອັນຄົບຖ້ວນຂອງປະເທດຊາດໃນທຸກເວລາ.
ທ່ານໂລເພັສ ອອກຖະແຫຼງການ ໃນຕອນຄ່ຳວັນດັ່ງກ່າວວ່າ, ບໍ່ວ່າຈະເກີດເລື່ອງຫຍັງຂຶ້ນ, ກອງທັບເວເນຊຸເອລາກໍ່ຈະເດັດດ່ຽວປົກປ້ອງອະທິປະໄຕອັນຄົບຖ້ວນຂອງປະເທດຕົນໃນທຸກເວລາ. ຂະນະດຽວກັນ, ທ່ານຕຳນິວ່າ ຖ້ອຍຄວາມຂອງປະທານາທິບໍດີອາເມລິກາເປັນຖ້ອຍຄວາມທີ່ປ່ວງບ້າ ແລະຫົວຈັດ.
ຂະນະທີ່ທ່ານເອເນັສໂຕ ວິເລກັສ ລັດຖະມົນຕີກະຊວງຖະແຫຼງຂ່າວເວເນຊຸເອລາ ກໍກ່າວຄຳປາໄສທາງໂທລະພາບໃນມື້ດຽວກັນວ່າ, ອາເມລິກາກ່າວຖ້ອຍຄວາມຂົ່ມຂູ່ປະເທດຕົນໜັກໜ່ວງກວ່າທຸກຄັ້ງຜ່ານມາ, ນີ້ຈະເຮັດໃຫ້ປະຊາຊົນເວເນຊຸເອລາສາມັກຄີເປັນເອກະພາບກັນເພື່ອປະຕິເສດການແຊກແຊງ ແລະປົກປ້ອງປະເທດຊາດ.
ວັນທີ 11 ສິງຫານີ້, ທ່ານໂດນັນ ທຣຳ ປະທານາທິບໍດີ ກ່າວວ່າ, ໃນການຮັບມືກັບສະຖານະການໃນປັດຈຸບັນຂອງເວເນຊຸເອລາ, ອາເມລິກາມີຫຼາຍທາງເລືອກ, ແລະຕົນຈະບໍ່ປະຕິເສດຄວາມອາດເປັນໄປໄດ້ທີ່ຈະໃຊ້ການເຄື່ອນໄຫວທາງການທະຫານຕໍ່ເວເນຊຸເອລາ. ນີ້ແມ່ນເທື່ອທຳອິດທີ່ລັດຖະບານທຣຳ ສະແດງທ່າທີດັ່ງກ່າວຕໍ່ເວເນຊຸເອລາ ຫຼັງຈາກເວເນຊຸເອລາປະກາດຈະຈັດການເລືອກຕັ້ງກອງປະຊຸມຮ່າງລັດຖະທຳມະນູນແຫ່ງຊາດເປັນຕົ້ນມາ.