ວັນທີ 14 ສິງຫານີ້, ທ່ານໂດນັນ ທຣຳ ປະທານາທິບໍດີອາເມລິກາ ໄດ້ລົງນາມໃນບົດບັນທຶກມອບສິດໃຫ້ຜູ້ຕາງໜ້າການຄ້າປະເທດຕົນກວດກາບັນຫາທີ່ກ່າວອ້າງວ່າ "ການປະພຶດທາງການຄ້າຂອງຈີນ" ລວມທັງການປະພຶດຕ່າງໆ ໃນຂົງເຂດຊັບສິນທາງປັນຍາ ເປັນເຕົ້ນການມອບໂອນເຕັກນິກ. ຂະນະທີ່ການກະທຳຂອງທ່ານທຣຳ ໄດ້ເຮັດໃຫ້ວົງການຕ່າງໆເປັນຫ່ວງທີ່ອາເມລິກາເຄື່ອນໄຫວແຕ່ຝ່າຍດຽວ ເຊິ່ງຈະນຳໄປສູ່ເປັນການທຳລາຍການພົວພັນດ້ານເສດຖະກິດການຄ້າລະຫວ່າງສອງປະເທດ.
ຜູ້ເບິ່ງກວ້າງເຫັນໄກໃນວົງການການເມືອງ ແລະ ວົງການການຄ້າອາເມລິກາຫຼາຍທ່ານ ຊີ້ໃຫ້ເຫັນວ່າ: ຖ້າລັດຖະບານປະເທດຕົນບໍ່ເອົາຫົວຊາຕໍ່ກົດລະບຽບຂອງອົງການການຄ້າໂລກ ແລະ ເຄື່ອນໄຫວແຕ່ຝ່າຍດຽວເພື່ອແກ້ໄຂຄວາມຂັດແຍ້ງກັບຄູ່ຄ້າຂອງຕົນ ບໍ່ພຽງແຕ່ຈະບໍ່ເປັນຜົນດີຕໍ່ການແກ້ໄຂບັນຫາເທົ່ານັ້ນ, ແຕ່ຍັງຈະກະທົບເຖິງຜົນປະໂຫຍດຂອງຜູ້ບໍລິໂພກ ແລະ ວິສາຫະກິດນຳເຂົ້າ-ສົ່ງອອກ ຂອງປະເທດຕົນອີກດ້ວຍ.
ທ່ານຮວ້າຊຸ່ນຢິງ ໂຄສົກກະຊວງການຕ່າງປະເທດຈີນ ກ່າວໃນວັນທີ 14 ສິງຫານີ້ວ່າ: ຈີນຫວັງວ່າອາເມລິກາຈະປະຕິບັດຕໍ່ບັນຫາຕາມຄວາມເປັນຈິງ, ຕີລາຄາຕໍ່ຄວາມພະຍາຍາມແລະຄວາມຄືບໜ້າຂອງຈີນໃນການອະນຸລັກຊັບສິນທາງປັນຍາຢ່າງພາວະວິໄສ ພ້ອມດ້ວຍຜົນສຳເລັດຂອງຈີນໃນການພັດທະນາເສດຖະກິດໂດຍການປະດິດສ້າງໃໝ່ດ້ວຍຕົນເອງ.
