ໜັງສືພິມຟິລິບປິນສະຕາລາຍງານຫວ່າງມໍ່ໆນີ້ວ່າ, ຕາມຂໍ້ມູນຂອງທະນາຄານກາງ, ທຶນຕ່າງປະເທດທີ່ໄຫຼເຂົ້າປະເທດຕົນໂດຍກົງໃນເດືອນພຶດສະພາຜ່ານມາ ໄດ້ບັນລຸເຖິງ 572 ລ້ານໂດລາສະຫະລັດ ເຊິ່ງເພີ່ມຂຶ້ນ 57% ເມື່ອທຽບໃສ່ໄລຍະດຽວກັນຂອງປີຜ່ານມາ.
ນັບແຕ່ເດືອນມັງກອນຫາເດືອນພຶດສະພາຜ່ານມາ, ຟິລິບປິນສາມາດດຶງດູດທຶນຕ່າງປະເທດໄດ້ 3 ຕື້ໂດລາສະຫະລັດ ເຊິ່ງຕົ້ນຕໍມາຈາກຍີ່ປຸ່ນ, ອາເມລິກາ, ຮົງກົງຈີນ, ສິງກະໂປ ແລະມາເລເຊຍທີ່ລົງທຶນໃນຂະແໜງການເຮືອນຢູ່ທີ່ດິນ, ການເງິນ, ການປະກັນໄພ, ຂະແໜງການຜະລິດ, ພະລັງງານໄຟຟ້າ, ອາຍແກັສທຳມະຊາດ, ອາຍຮ້ອນແລະເຄື່ອງປັບອາກາດ ພ້ອມດ້ວຍການຄ້າຂາຍຍົກແລະຂາຍຍ່ອຍ.
ເມື່ອປີ 2016, ລວມຍອດຜະລິດຕະພັນພາຍໃນຂອງຟິລິບປິນ ໄດ້ເພີ່ມຂຶ້ນ 6,9%, ແຕ່ມາຮອດໄຕມາດທຳອິດປີນີ້ ໄດ້ຫຼຸດລົງເຖິງ 6,4%. ຂະນະດຽວກັນ, ອັດຕາເງິນເຟີ້ສະເລ່ຍແຕ່ເດືອນມັງກອນຫາເດືອນກໍລະກົດຜ່ານມາຢູ່ໃນລະດັບ 3,1% ເຊິ່ງຍັງຢູ່ໃນເປົ້າໝາຍທີ່ທະນາຄານກາງຕັ້ງໄວ້.
 |
