ຫວ່າງມໍ່ໆມານີ້, ທ່ານໂລເຣນສ໌ ວອງ ລັດຖະມົນຕີກະຊວງພັດທະນາແຫ່ງຊາດ ທັງເປັນລັດຖະມົນຕີທີສອງກະຊວງການເງິນສິງກະໂປ ໄດ້ຊົມເຊີຍຈີນທີ່ວາງຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ເຊິ່ງຈະປ່ຽນແປງຂະບວນການພັດທະນາຂອງອາຊີໃນຕໍ່ໜ້າ ແລະກາຍເປັນເວທີຮ່ວມມືພາກພື້ນທີ່ມີຄວາມສາມາດບົ່ມຊ້ອນໃຫຍ່ທີ່ສຸດ.
ໃນພິທີຖະແຫຼງຂ່າວໃນວັນທີ 16 ສິງຫານີ້, ທ່ານນາງຮວ້າຊຸ່ນຢິງ ໂຄສົກກະຊວງການຕ່າງປະເທດຈີນ ກໍໄດ້ກ່າວຕໍ່ຄຳເຫັນຂອງທ່ານໂລເຣນສ໌ ວອງ ວ່າ: ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ຂອງຈີນໄດ້ສອດຄ່ອງກັບກະແສຍຸກປັດຈຸບັນລວມທັງກົດເກນການພັດທະນາ ແລະຜົນປະໂຫຍດຂອງປະຊາຊົນບັນດາປະເທດ ເຊິ່ງມີອະນາຄົດອັນກວ້າງຂວາງ. ຈາກນີ້ ຈີນຈຶ່ງພ້ອມສືບຕໍ່ຮ່ວມມືກັບປະເທດຕ່າງໆ ຍຶດຖືຫຼັກການຮ່ວມມືດ້ວຍການປຶກສາຫາລືກັນ, ກໍ່ສ້າງຮ່ວມກັນ ແລະ ຊົມໃຊ້ຮ່ວມກັນ ໃນການສ້າງ "ໜຶ່ງແລວທາງໜຶ່ງເສັ້ນທາງ". ຂະນະດຽວກັນ, ກໍຈະເພີ່ມທະວີການຮ່ວມມືກັບສິງກະໂປໃນຂອບ "ໜຶ່ງແລວທາງໜຶ່ງເສັ້ນທາງ", ຊຸກຍູ້ສາຍພົວພັນຄູ່ຮ່ວມມືຮອບດ້ານເພື່ອກ້າວໄປພ້ອມຍຸກສະໄໝລະຫວ່າງສອງປະເທດໃຫ້ມີການພັດທະນາຍິ່ງໆຂຶ້ນ ແລະ ສ້າງຄວາມຜາສຸກໃຫ້ແກ່ປະຊາຊົນສອງຊາດ.
