ແຫຼ່ງຂ່າວຈາກໂຮງໝໍປະຊາຊົນກິ່ງແຂວງສິບສອງພັ່ນນາແຂວງຢຸນນານ ສປ ຈີນ ໃຫ້ຮູ້ໃນວັນທີ 17 ສິງຫານີ້ວ່າ: ໜ່ວຍແພດສຸກເສີນການປິ່ນປົວສາກົນສິບສອງພັ່ນນາຈີນ-ເຂດພາກເໜືອລາວ ໄດ້ສ້າງຕັ້ງຂຶ້ນຢູ່ແຂວງຫຼວງນ້ຳທາ ສປປ ລາວຢ່າງເປັນທາງການ ແລະເປັນໜ່ວຍງານທຳອິດຢູ່ພາກເໜືອລາວ ໂດຍຈະປະຕິບັດໜ້າທີ່ສຳຄັນໃນການຮັບມືຂ້າມຊາດສຸກເສີນ ຂະນະເກີດໄພພິບັດກະທັນຫັນ ເປັນຕົ້ນ ແຜ່ນດິນໄຫວ, ນ້ຳຊຸທັ່ງດິນພູເຈື່ອນ ແລະອື່ນໆ.
ຂ່າວລາຍງານຕື່ມວ່າ: ການສ້າງຕັ້ງໜ່ວຍປິ່ນປົວດັ່ງກ່າວແມ່ນສ່ວນໜຶ່ງຂອງໂຄງການສ້າງໜ່ວຍຮ່ວມມືການບໍລິການການປິ່ນປົວແລະສາທາລະນະສຸກ 5 ແຂວງຊາຍແດນຈີນ-ລາວ, 10 ບວກ 1 ໂດຍການຈັດຕັ້ງປະຕິບັດຂອງຄະນະກຳມະການສາທາລະນະສຸກແລະການວາງແຜນຄອບຄົວແຫ່ງຊາດຈີນ-ອາຊຽນ. ນັບແຕ່ເດືອນພຶດສະພາປີນີ້ເປັນຕົ້ນໄປ, ໂຮງໝໍປະຊາຊົນກິ່ງແຂວງສິບສອງພັ່ນນາ ໄດ້ຍົກລະດັບຄວາມສາມາດການຮັບມືສຸກເສີນແລະການປະຖົມພະຍາບານໃຫ້ແກ່ພະນັກງານແພດຂອງໂຮງໝໍແຂວງຕ່າງໆຢູ່ພາກເໜືອລາວ ເຊິ່ງເປັນການສ້າງພື້ນຖານໃຫ້ແກ່ການສ້າງຄວາມສາມາດດ້ານການນຳສົ່ງ ແລະ ປິ່ນປົວຄົນເຈັບຂອງທ້ອງຖິ່ນ.