ວັນທີ 17 ສິງຫານີ້, ກົມຄຸ້ມຄອງແລະກວດຄົນເຂົ້າເມືອງຟີລິບປິນໄດ້ເປີດເຜີຍວ່າ: ເພື່ດດຶງດູດນັກທ່ອງທ່ຽວແລະນັກລົງທຶນຈີນໃຫ້ຫຼາຍກວ່າເກົ່າ, ລັດຖະບານຈະອອກນະໂຍບາຍວີຊ່າກັບດ່ານໂດຍເປົ້າໝາຍເນັ້ນນັກທ່ອງທ່ຽວເປັນຄະນະ,ນັກທຸລະກິດແລະຜູ້ຕາງໜ້າທີ່ເຂົ້າຮ່ວມກອງປະຊຸມ.
ກົມດັ່ງກ່າວລະບຸເນື້ອໃນໃນຖະແຫຼງການວ່າ: ນະໂຍບາຍວີຊ່າກັບດ່ານດັ່ງກ່າວເໝາະໃຊ້ກັບພົນລະເມືອງຈີນ 3 ປະເພດຄື: ສະມາຊິກຄະນະທ່ອງທ່ຽວທີ່ບໍລິສັດທ່ອງທ່ຽວຈັດຕັ້ງທີ່ໄດ້ຮັບການມອບສິດຈາກຂະແໜງການທ່ອງທ່ຽວຟີລິບປິນ; ນັກທຸລະກິດທີ່ໄດ້ຮັບການຢັ້ງຢືນຈາກສະພາການຄ້າຟີລິບປິນຫຼືຕ່າງປະເທດກໍຄືພາກລັດອື່ນໆ; ຜູ້ຕາງໜ້າແລະນັກກິລາທີ່ເຂົ້າຮ່ວມກອງປະຊຸມແລະງານວາງສະແດງຢູ່ຟີລິບປິນ.
ຖະແຫຼງການເນັ້ນວ່າ: ນັກທ່ອງທ່ຽວຈີນທີ່ຂໍວີຊ່າກັບດ່ານຕ້ອງຍື່ນໃບສະໜີຂໍຕໍ່ກົມຄຸ້ມຄອງແລະກວດຄົນເຂົ້າເມືອງຟີລິບປິນລ່ວງໜ້າ 10 ວັນໂດຍຜ່ານບໍລິສັດທ່ອງທ່ຽວກ່ອນຈະອອກເດີນທາງຫຼັງນັກທ່ອງທ່ຽວໄດ້ຮັບວີຊ່າກັບດ່ານກໍສາມາດຢູ່ຟີລິບປິນໄດ້ 30 ວັນ ແລະຈະຂໍຕໍ່ເພີ່ມອີກບໍ່ໃຫ້ກາຍ 6 ເດືອນ.
ແນວໃດກໍດີຈະປະຕິບັດນະໂຍບາຍດັ່ງກ່າວໃນເວລາໃດ, ກົມດັ່ງກ່າວກ່າວວ່າ: ປັດຈຸບັນຍັງບໍ່ມີເວລາທີ່ແນ່ນອນເທື່ອ ເນື່ອງຈາກຕ້ອງໄດ້ຄົ້ນຄວ້າຢ່າງລະອຽດຕື່ມອີກ.
 |
