ທ່ານລູ້ຈິງຢູ ຮອງຫົວໜ້າພະແນກທີ່ດິນແຫ່ງຊາດແລະຊັບພະຍາກອນເຂດປົກຄອງຕົນເອງເຜົ່າຈ້ວງກວາງຊີ ສປ ຈີນເປີດເຜີຍໃນວັນທີ 18 ສິງຫານີ້ວ່າ ຫຼັງໄດ້ຮັບການຢັ້ງຢືນຜ່ານການທົດລອງແລະກວດກາຈາກອົງການຈັດຕັ້ງຝ່າຍທີ 3, ສູນບໍລິການຂໍ້ມູນຂ່າວສານຂະແໜງການບໍ່ແຮ່ຈີນ-ອາຊຽນໄດ້ເປີດນຳໃຊ້ຢ່າງຮອບດ້ານແລ້ວເມື່ອມໍ່ໆນີ້ ເພື່ອບໍລິການການແລກປ່ຽນແລະຮ່ວມມືປະຈຳວັນໃນຂະແໜງການບໍ່ແຮ່.
ສຳນັກເລຂາທິການຄະນະກຳມະການກອງປະຊຸມເວທີປຶກສາຫາລືການຮ່ວມມືຂະແໜງການບໍ່ແຮ່ຈີນ-ອາຊຽນປີ 2017 ໄດ້ຖະແຫຼງຂ່າວຢູ່ເມືອງໜານໜິງໃນມື້ດຽວກັນ ແລະທ່ານລູ້ຈິງຢູເປີດເຜີຍໃນພິທີດັ່ງກ່າວວ່າ, ໃນຖານະເປັນໜຶ່ງໃນໂຄງການ "ສູນຂໍ້ມູນຂ່າວສານຈີນ-ອາຊຽນ", ສູນບໍລິການຂໍ້ມູນຂ່າວສານຂະແໜງການບໍ່ແຮ່ຈີນ-ອາຊຽນນຳໃຊ້ສອງພາສາ ຄື ພາສາຈີນ ແລະພາສາອັງກິດ ແລະແບ່ງອອກເປັນ 9 ພາກ ເຊັ່ນ: ກອງປະຊຸມເວທີປຶກສາຫາລືທາງການ, ຂໍ້ມູນຂະແໜງການບໍ່ແຮ່, ການຮ່ວມມືໂຄງການ, ການຄ້າຜະລິດຕະພັນ, ຂໍ້ມູນອາຊຽນ ແລະອື່ນໆ. ປັດຈຸບັນ, ການອອກແບບ, ການກໍ່ສ້າງຖານຂໍ້ມູນ ແລະການຊື້ເຄື່ອງສະສົມຂໍ້ມູນທາງອິນເຕີເນັດໄດ້ສຳເລັດແລ້ວ ແລະໄດ້ສ້າງການພົວພັນຮ່ວມມືແບບປະຈຳກັບພາກສ່ວນທີ່ກ່ຽວຂ້ອງ.
 |
