ຕົວເລກທີ່ເຈົ້າໜ້າທີ່ລັດຖະບານໄທເປີດເຜີຍໃນວັນທີ 21 ສິງຫານີ້ວ່າ, GDP ໃນໄຕມາດທີ 2 ປີນີ້ໄດ້ເພີ່ມຂຶ້ນ 3,7% ແລະສູງກວ່າໄຕມາດທຳອິດທີ່ຢູ່ໃນລະດັບ 3,3% ແລະເປັນຈັງຫວະເຕີບໂຕສູງສຸດນັບແຕ່ໄຕມາດທີ 2 ປີ 2013 ເປັນຕົ້ນມາ.
ຂ່າວແຈ້ງວ່າ, ໄທບັນລຸຍອດມູນຄ່າການຄ້າສົ່ງອອກໃນໄຕມາດທີ 2 ປີນີ້ເຖິງ 56 ຕື້ 145 ລ້ານໂດລາ ເພີ່ມຂຶ້ນ 8% ເມື່ອທຽບໃສ່ໄລຍະດຽວກັນຂອງປີຜ່ານມາ ແລະສູງກວ່າຈັງຫວະເຕີບໂຕໃນໄຕມາດທຳອິດຂອງປີນີ້ ທີ່ຢູ່ໃນລະດັບ 6,8% ແລະມູນຄ່າການຄ້າສົ່ງອອກໃນຕະຫຼາດສຳຄັນຕ່າງໆ ເຊັ່ນ ຈີນ, ອາເມລິກາ, ຍີ່ປຸ່ນ ແລະອິນເດຍ ລ້ວນແຕ່ເພີ່ມຂຶ້ນ; ຂະນະທີ່ຍອດມູນຄ່າການຄ້ານຳເຂົ້າກໍບັນລຸ 49 ຕື້ 523 ລ້ານໂດລາ ແລະເພີ່ມຂຶ້ນ 13,8%. ນອກນີ້, ການລົງທຶນຂອງເອກະຊົນກໍເພີ່ມຂຶ້ນ 3,2% ໂດຍຕົ້ນຕໍຢູ່ໃນຂະແໜງການກົນຈັກແລະກໍ່ສ້າງ, ສ່ວນການລົງທຶນຂອງລັດວິສາຫະກິດກໍເພີ່ມຂຶ້ນ 20,5%.
ເຈົ້າໜ້າທີ່ພາກສ່ວນເສດຖະກິດໄທເຫັນວ່າ, ເສດຖະກິດປະເທດຕົນໄດ້ເພີ່ມຂຶ້ນຢ່າງໜັກແໜ້ນ ແລະຄາດວ່າ 6 ເດືອນທ້າຍປີ, ການລົງທຶນຂອງລັດຖະບານແລະເອກະຊົນຈະເພີ່ມຂຶ້ນຢ່າງຕໍ່ເນື່ອງ, ການສົ່ງອອກ, ຂະແໜງການໂຮງແຮມແລະຮ້ານອາຫານ, ການຜະລິດອຸດສາຫະກຳກໍຈະເພີ່ມຂຶ້ນ. ຈາກນີ້ຈິ່ງໄດ້ຍົກຄາດໝາຍການເຕີບໂຕຂອງເສດຖະກິດໝົດປີຂຶ້ນແຕ່ 3,5% ຫາ 4%.