ຫວ່າງມໍ່ໆມານີ້, ໜັງສືພິມການຄ້າຟີລິບປິນໄດ້ຕີຂ່າວວ່າ: ຈາກກ່ອນໜ້ານີ້, ທ່ານ ຄາປີໂອ ຜູ້ພິພາກສາໃຫຍ່ຂອງຟີລິບປິນເຄີຍກ່າວວ່າ "ຈີນບຸກເຂົ້າແດນຟີລິບປິນ" ນັ້ນ, ທ່ານ ໂຣດຣີໂກ ດູເຕີເຕ ປະທານາທິບໍດີຟີລິບປິນກໍໄດ້ກ່າວໃນການຖະແຫຼງຂ່າວທີ່ຈັດຂຶ້ນຢູ່ທຳນຽບປະທານາທິບໍດີໃນວັນທີ 21 ສິງຫານີ້ວ່າ: "ພວກເຮົາບໍ່ໄດ້ຖືກຮຸກຮານ ແລະນີ້ບໍ່ແມ່ນເລື່ອງຈິງ."
ຂະນະທີ່ທ່ານນາງ ຮວ້າຊຸ່ນຢິງ ໂຄສົກກະຊວງການຕ່າງປະເທດຈີນກ່າວໃນການຖະແຫຼງຂ່າວທີ່ຈັດຂຶ້ນໃນວັນທີ 22 ສິງຫານີ້ ໂດຍໄດ້ຕອບຄຳຖາມຕໍ່ການລາຍງານຂ່າວດັ່ງກ່າວວ່າ: "ບໍ່ວ່າບຸກຄົນໃດໆໃນປະເທດຟີລິບປິນທີ່ຕຳໜິຈີນຕາມລຳພັງໃຈນັ້ນລ້ວນແຕ່ຫວັງຍຸແຍ່ໃຫ້ເກີດຄວາມຂັດແຍ້ງກັນລະຫວ່າງຈີນກັບຟີລິບປິນ ລວມທັງອາດຈະມີຈຸດປະສົງອື່ນທີ່ບໍ່ສາມາດເປີດເຜີຍໄດ້."
ທ່ານນາງ ຮວ້າຊຸ່ນຢິງ ເນັ້ນວ່າ: ແຕ່ໃດມາ,ຈີນໄດ້ສຸມໃສ່ແກ້ໄຂຄວາມຂັດແຍ້ງບັນຫາຕ່າງໆກັບປະເທດອະທິປະໄຕທີ່ກ່ຽວຂ້ອງໂດຍກົງດ້ວຍການປຶກສາຫາລືແລະການເຈລະຈາ. ຂະນະດຽວກັນ,ຈີນກໍຍິນດີຮ່ວມກັບຟີລິບປິນແລະປະເທດອື່ນໆໃນອາຊຽນ ສືບຕໍ່ຈັດຕັ້ງປະຕິບັດຖະແຫຼງການແຫ່ງການປະພຶດຂອງບັນດາຝ່າຍໃນທະເລຈີນໃຕ້ຢ່າງຮອບດ້ານແລະມີປະສິດທິຜົນ,ລົງເລິກການຮ່ວມມືທາງທະເລຢ່າງແທ້ຈິງ,ຕັ້ງໜ້າຊຸກຍູ້ການປຶກສາຫາລືກ່ຽວກັບກົດແຫ່ງການປະພຶດໃນທະເລຈີນໃຕ້,ຮ່ວມກັນປົກປັກຮັກສາສະຖານະການທະເລຈີນໃຕ້ໃນປັດຈຸບັນທີ່ຍາດມາໄດ້ນັ້ນໄດ້ເປັນຢ່າງດີ,ຊຸກຍູ້ສາຍພົວພັນລະຫວ່າງຈີນ-ຟີລິບປິນໃຫ້ສືບຕໍ່ຂະຫຍາຍຕົວໄປໃນທາງທີ່ດີ.