ບົດປະພັນ "ຫຼຸດພົ້ນອອກຈາກຄວາມທຸກຍາກ" ຂອງທ່ານສີຈິ້ນຜິງສະບັບພາສາອັງກິດແລະຝຣັ່ງໄດ້ພິມຈຳໜ່າຍເປັນຄັ້ງທຳອິດຢູ່ຈີນໃນງານວາງສະແດງປຶ້ມສາກົນປັກກິ່ງຄັ້ງທີ 24.
ບົດປະພັນ "ຫຼຸດພົ້ນອອກຈາກຄວາມທຸກຍາກ" ເປັນບົດປະພັນສ່ວນຕົວຂອງທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດ ແລະປະທານຄະນະກຳມະການການທະຫານສູນກາງຈີນ ໂດຍໄດ້ຮິບໂຮມບົດປາໄສສຳຄັນແລະບົດຂຽນທີ່ໄດ້ລົງຕິດຕາມກວດກາວຽກງານ 29 ບົດ ໃນໄລຍະທ່ານເປັນເລຂາຄະນະພັກເມືອງນິ້ງເຕີ໋ແຕ່ປີ 1988 ຫາປີ 1990 ລວມທັງຮູບພາບສີ 10 ໃບ ແລະອີກ 6 ໃບເປັນຮູບໃນໄລຍະທີ່ທ່ານເຮັດວຽກຢູ່ເມືອງນິ້ງເຕີ໋.
ບົດປະພັນດັ່ງກ່າວໄດ້ເນັ້ນເນື້ອໃນທີ່ເຂດພາກຕາເວັນອອກແຂວງຝູຈ້ຽນຄວນເຮັດແນວໃດ ເພື່ອຫຼຸດພົ້ນອອກຈາກຄວາມທຸກຍາກ, ສ້າງຄວາມຮັ່ງມີ ແລະເລັ່ງພັດທະນາ ໂດຍໄດ້ສະເໜີລະບຽບ, ທັດສະນະຄະຕິ, ທັດສະນະແລະວິທີຕ່າງໆອອກມາ ເພື່ອແກ້ບັນຫາລະຫວ່າງທິດສະດີແລະພຶດຕິກຳທີ່ສຳຄັນໃນການຊຸກຍູ້ການພັດທະນາເສດຖະກິດສັງຄົມພາກຕາເວັນອອກຂອງແຂວງຝູຈ້ຽນ ເຊິ່ງປະກອບມີການສ້າງເສດຖະກິດ, ການສ້າງລະບົບການເມືອງ, ການສ້າງວັດທະນະທຳ, ການສ້າງສັງຄົມ, ການສ້າງອະລິຍະທຳນິເວດວິທະຍາ, ການກໍ່ສ້າງພັກ ແລະອື່ນໆ ໂດຍມີເນື້ອໃນດ້ານແນວຄິດທີ່ອຸດົມສົມບູນ ແລະມີຄຸນຄ່າດ້ານທິດສະດີສູງ ແລະມີຈິດໃຈຄືກັນກັບຄຳປາໄສສຳຄັນຕ່າງໆຂອງເລຂາທິການໃຫຍ່ສີຈິ້ນຜິງ ນັບແຕ່ກອງປະຊຸມໃຫຍ່ຄັ້ງທີ 18 ຂອງພັກເປັນຕົ້ນມາ. ຂະນະດຽວກັນ, ບົດປະພັນດັ່ງກ່າວມຍັງໄດ້ສ່ອງແສງໃຫ້ເຫັນເຖິງສະພາບເຮັດວຽກໃນທ່າມກາງຄວາມລຳບາກຂອງທ່ານສີຈິ້ນຜິງຢູ່ເມືອງນິ້ງເຕີ໋ໃນໄລຍະ 2 ປີ ແລະສ່ອງແສງໃຫ້ເຫັນການໄດ້ຍຶດໝັ້ນອຸດົມການແລະຄວາມຕັ້ງໃຈເພື່ອປະຊາຊົນຂອງທ່ານໃນໄລຍະທ່ານນຳພາປະຊາຊົນເຂດທຸກຍາກຫຼຸດພົ້ນອອກຈາກຄວາມທຸກຍາກ.
ຂ່າວແຈ້ງວ່າ, ຫຼັງຈາກບົດປະພັນດັ່ງກ່າວໄດ້ແປເປັນພາສາອັງກິດແລະຝຣັ່ງ ທັງໄດ້ພິມຈຳໜ່າຍແລ້ວ ກໍໄດ້ເຜີຍແຜ່ຢູ່ໃນກອງປະຊຸມເວທີປຶກສາຫາລືຂັ້ນສູງກ່ຽວກັບການຫຼຸດຜ່ອນຄວາມທຸກຍາກແລະການແລກປ່ຽນຫົວກະທິປັນຍາສຳຄັນຕ່າງໆ ອັນເຮັດໃຫ້ປະມຸກລັດ, ນັກວິຊາການ ແລະສື່ມວນຊົນບັນດາປະເທດອາຟຣິກາສົນໃຈແລະຕີລາຄາສູງຕໍ່ບົດປະພັນດັ່ງກ່າວ.
