ລັດຖະບານກຳປູເຈຍແລະບໍລິສັດພະລັງງານຄຼິສທີ່ມີສຳນັກງານໃຫຍ່ຕັ້ງຢູ່ສິງກະໂປ ໄດ້ເຊັນສັນຍາຂຸດຄົ້ນບໍ່ນ້ຳມັນເຊື້ອໄຟເຂດ A ໃນເຂດທະເລກຳປູເຈຍຢູ່ນະຄອນຫຼວງພະນົມເປັນໃນວັນທີ 23 ສິງຫານີ້ ເຊິ່ງການລົງນາມດັ່ງກ່າວເປັນຂີດໝາຍສະແດງໃຫ້ເຫັນວ່າ, ກຳປູເຈຍໄດ້ກ້າວສູ່ການຂຸດຄົ້ນນ້ຳມັນເຊື້ອໄຟເປັນເທື່ອທຳອິດ.
ສັນຍາດັ່ງກ່າວໄດ້ລະບຸວ່າ, ບໍລິສັດພະລັງງານຄຼິສ ຈະກໍ່ສ້າງພື້ນຖານໂຄງລ່າງແລະຂຸດຄົ້ນນ້ຳມັນເຊື້ອໄຟໃຫ້ສຳເລັດພາຍໃນ 24 ເດືອນຫຼັງເຊັນສັນຍາ.
ຂ່າວແຈ້ງວ່າ, ກຳປູເຈຍໄດ້ຂີດແບ່ງບໍ່ນ້ຳມັນເຊື້ອໄຟຂອງຕົນເປັນ 6 ເຂດຄື: A, B, C, D, E ແລະ F, ໃນນັ້ນ ເຂດ A ມີປະລິມານສະສົມນ້ຳມັນເຊື້ອໄຟແລະອາຍແກັສທຳມະຊາດຫຼາຍທີ່ສຸດ ແລະເລິກແຕ່ 50-80 ແມັດ. ສ່ວນບໍ່ນ້ຳມັນເຂດ A ແບ່ງເປັນສອງໄລຍະພັດທະນາຄື 1A ແລະ 1B ໂດຍຄາດວ່າຈະສາມາດຜະລິດນ້ຳມັນໄດ້ 30 ລ້ານບາເຣນ.