ເຈົ້າໜ້າທີ່ກະຊວງກະສິກຳຟີລິບປິນເປີດເຜີຍໃນວັນທີ 24 ສິງຫານີ້ວ່າ, ອີງຕາມຜົນການກວດກາຂອງອົງການກວດກາອົສຕຣາລີ, ໄຂ້ຫວັດສັດປີກທີ່ເກີດຂຶ້ນຢູ່ແຂວງປຳປັນກາ ພາກເໜືອຟີລິບປິນເກີດຈາກເຊື້ອພະຍາດ H5N6 ແລະຄົນກໍອາດຈະຕິດເຊື້ອພະຍາດນີ້ ແຕ່ມີຄວາມສ່ຽງຕ່ຳ.
ວັນທີ 11 ສິງຫານີ້, ແຂວງປຳປັນກາຢູ່ເກາະລູຊອນໄດ້ເກີດການລະບາດພະຍາດໄຂ້ຫວັດສັດປີກ ສົ່ງຜົນເຮັດໃຫ້ໄກ່ຕາຍ 3 ໝື່ນ 8 ພັນໂຕ ແລະຂະນະດຽວກັນ, ເຈົ້າໜ້າທີ່ທີ່ກ່ຽວຂ້ອງກໍໄດ້ຂ້າສັດປີກເກືອບ 4 ແສນໂຕ. ຈາກນັ້ນ 1 ອາທິດ, ແຂວງນິວວາອີຊີຈາ ທີ່ໃກ້ແຂວງປຳປັນກາກໍເກີດພະຍາດໄຂ້ຫວັດສັດປີກ.
ເພື່ອປ້ອງກັນບໍ່ໃຫ້ພະຍາດແຜ່ລະບາດ, ທຸກຜະລິດຕະພັນສັດປີກຂອງເກາະລູຊອນໄດ້ຖືກຫ້າມບໍ່ໃຫ້ສົ່ງໄປເຂດວິຊາຢາສ໌, ເກາະມິນດານາວ ແລະເຂດອື່ນໆໃນຟີລິບປິນ. ຂະນະທີ່ໃນປັດຈຸບັນ, ຍີ່ປຸ່ນ, ສ.ເກົາຫຼີ ແລະສິງກະໂປໄດ້ຍົກເລີກນຳເຂົ້າຜະລິດຕະພັນສັດປີກຈາກຟີລິບປິນເປັນການຊົ່ວຄາວແລ້ວ.
 |
