ກຳປູເຈຍເປັນປະເທດທີ່ສົ່ງອອກເຂົ້າສານເປັນອັນດັບທີ 5 ໃນໂລກ ແລະເປັນປະເທດທີ່ສົ່ງອອກເຂົ້າຫອມມະລິເປັນອັນດັບສອງ.
ກະຊວງກະສິກຳກຳປູເຈຍລາຍງານວ່າ, ສາມາເສົ່ງອອກເຂົ້າສານໃນປີ 2016 ຜ່ານມາເຖິງ 5 ແສນ 4 ໝື່ນໂຕນ, ແຕ່ບໍ່ບັນລຸຕາມເປົ້າໝາຍສົ່ງອອກ 1 ລ້ານໂຕນ. ເຈົ້າໜ້າທີ່ສະຫະພັນເຂົ້າສານກຳປູເຈຍກ່າວວ່າ, ບັນຫາແນວພັນ ພ້ອມດ້ວຍບໍ່ສາມາດຂະຫຍາຍເນື້ອທີ່ການຜະລິດໃຫ້ກວ້າງອອກແລະອື່ນໆ ໄດ້ສາງຄວາມຫຍຸ້ງຍາກແລະເຮັດໃຫ້ການສົ່ງອອກເຂົ້າສານບໍ່ບັນລຸຕາມເປົ້າໝາຍ.
ແນວໃດກໍດີ, ເຖິງວ່າຈະມີຄວາມຫຍຸ້ງຍາກຫຼາຍປະການກໍຕາມ, ແຕ່ກຳປູເຈຍ ກໍໄດ້ສົ່ງອອກເຂົ້າສານໄປ 27 ປະເທດແລ້ວ ໂດຍໃນຈຳນວນ 5 ແສນ 4 ໝື່ນໂຕນທີ່ສົ່ງອອກໃນປີ 2016 ຜ່ານມາ, ສົ່ງມາຈີນ 1 ແສນ 2 ໝື່ນ 7000 ໂຕນ ເປັນອັບດັບໜຶ່ງໃນບັນດາປະເທດ. ບົດລາຍງານຂອງກະຊວງກະສິກຳກຳປູເຈຍລະບຸອີກວ່າ, ນັບແຕ່ເດືອນມັງກອນຮອດເດືອນກໍລະກົດປີນີ້, ກຳປູເຈຍສາມາດສົ່ງອອກເຂົ້າສານໄດ້ 315.916 ໂຕນ ເພີ່ມຂຶ້ນ 8,1% ເມື່ອທຽບໃສ່ໄລຍະດຽວກັນຂອງປີຜ່ານມາ ແລະຈີນຍັງເປັນປະເທດທີ່ນຳເຂົ້າເຂົ້າສານຂອງກຳປູເຈຍຫຼາຍທີ່ສຸດ. ນອກນີ້, ໃນຕົ້ນເດືອນສິງຫານີ້, ກຳປູເຈຍໄດ້ເຊັນບົດບັນທຶກຄວາມເຂົ້າໃຈກັບບັງກາລາເດັດ ໂດຍຈະສົ່ງອອກເຂົ້າສານ 1 ລ້ານໂຕນໃຫ້ປະເທດດັ່ງກ່າວສໃນ 5 ປີຕໍ່ໜ້າ.
 |
