ປີນີ້ແມ່ນປີຄົບຮອບ 20 ປີໃນການເກີດວິກິດການການເງິນອາຊີ ໂດຍຫຼາຍອົງການວິເຄາະວ່າ, ປັດຈຸບັນ, ການເຕີບໂຕທາງເສດຖະກິດອາຊີແມ່ນອາໄສຄວາມຕ້ອງການພາຍໃນປະເທດທີ່ແຂງແຮງ, ຂະນະທີ່ຄວາມສາມາດຕ້ານຄວາມສ່ຽງພາຍນອກ ກໍຕ້ອງໄດ້ຍົກສູງຂຶ້ນ. ຈາກນີ້, ຜູ້ວ່າການທະນາຄານພັດທະນາອາຊີໄດ້ກ່າວວ່າ ເສດຖະກິດອາຊີຈະມີອະນາຄົດສົດໃສ.
ຫວ່າງມໍ່ໆນີ້, ອົງການກອງທຶນເງິນຕາສາກົນ ຫຼື IMF ໄດ້ເປີດເຜີຍບົດລາຍງານ ໂດຍຍົກຄາດໝາຍການເຕີບໂຕທາງເສດຖະກິດຂອງອາຊີໃນປີນີ້ແລະປີໜ້າສູງຂຶ້ນ. ຂະນະດຽວກັນ, ທະນາຄານພັດທະນາອາຊີຄາດວ່າ, ຈັງຫວະເຕີບໂຕທາງເສດຖະກິດຂອງພາກພື້ນອາຊີຕາເວັນອອກສຽງໃຕ້ໃນປີນີ້ຈະບັນລຸ 4,8% ແລະປີໜ້າ 5% ໂດຍປະເທດທີ່ເສດຖະກິດພັດທະນາອ່າວໄວໃນພາກພື້ນນີ້ ປະກອບມີມາເລເຊຍ, ຟິລິບປິນ ແລະສິງກະໂປ.
ນອກນີ້, ທະນາຄານພັດທະນາອາຊີແລະອົງການກອງທຶນເງິນຕາສາກົນ ຕ່າງກໍໄດ້ຍົກຄາດໝາຍການເຕີບໂຕທາງເສດຖະກິດຂອງຈີນໃນປີນີ້ໃຫ້ສູງຂຶ້ນເຖິງ 6,7% ແລະປີໜ້າ 6,4%. ຂະນະດຽວກັນ, ໃນບົດລາຍງານຂອງທະນາຄານພັດທະນາອາຊີ ກໍໄດ້ລະບຸວ່າ, ການປັບຄາດໝາຍການເຕີບໂຕທາງເສດຖະກິດຂອງຈີນໃນປີນີ້ໃຫ້ສູງຂຶ້ນນັ້ນ ເນື່ອງຈາກການສົ່ງອອກສຸດທິແລະການບໍລິໂພກພາຍໃນປະເທດດີຂຶ້ນ.
ສ່ວນບົດລາຍງານເລື່ອງ "ຈ້ອງມອງເສດຖະກິດພາກພື້ນອາຊີປາຊິຟິກໃນອະນາຄົດ" ຂອງອົງການ IMF ຊີ້ໃຫ້ເຫັນວ່າ, ພາກພື້ນອາຊີປາຊິຟິກ ຍັງຄົງຮັກສາການເຕີບໂຕຢ່າງແຂງແຮງ, ແຕ່ກໍມີຄວາມບໍ່ແນ່ນອນໃນອະນາຄົດເຊັ່ນດຽວກັນ.