（ຈີນກາຍເປັນຕະຫຼາດນຳໃຊ້ມະນຸດກົນຈັກອຸດສາຫະກຳໃຫຍ່ອັນດັບໜຶ່ງໃນໂລກ 5 ປີຕິດຕໍ່ກັນ）
ບົດລາຍງານກ່ຽວກັບການພັດທະນາຂະແໜງການມະນຸດກົນຈັກຂອງຈີນທີ່ປະກາດຢູ່ນະຄອນຫຼວງປັກກິ່ງໃນວັນທີ 26 ສິງຫານີ້ສະແດງໃຫ້ເຫັນວ່າ, ຕະຫຼາດການນຳໃຊ້ມະນຸດກົນຈັກຂອງຈີນໄດ້ເຂົ້າສູ່ໄລຍະເຕີບໂຕຢ່າງວ່ອງໄວ ເຊິ່ງກາຍເປັນຕະຫຼາດໃຫຍ່ອັນດັບທີ 1 ໃນໂລກ 5 ປີຕິດຕໍ່ແລ້ວ.
ທ່ານ ຫຼີຖິງ ຫົວໜ້າສູນຄົ້ນຄວ້າຂອງສະຖາບັນເອເລັກໂຕຼນິກຈີນໃຫ້ຮູ້ວ່າ, ຈີນແມ່ນຕະຫຼາດໃຫຍ່ອັນດັບໜຶ່ງໃນໂລກໃນດ້ານການນຳໃຊ້ມະນຸດກົນຈັກທາງອຸດສາຫະກຳ ເຊິ່ງກວມໂກຕາປະມານ 1/3 ຂອງຕະຫຼາດທົ່ວໂລກ. ຄຽງຄູ່ກັບຂະແໜງການການຜະລິດທີ່ໄດ້ຮັບການປັບປຸງເຕັກນິກສູງແລ້ວ, ຕະຫຼາດນຳໃຊ້ມະນຸດກົນຈັກທາງອຸດສາຫະກຳຈະສືບຕໍ່ພັດທະນາ ແລະ ຄາດວ່າ ຈຳນວນມະນຸດກົນຈັກທາງອຸດສາຫະກຳທີ່ຈຳໜ່າຍຢູ່ຈີນໃນປີ 2017 ຈະຫຼາຍກວ່າ 1 ແສນ 1 ໝື່ນເຄື່ອງ ເຊິ່ງມີຍອດມູນຄ່າບັນລຸເຖິງ 4 ຕື້ 220 ລ້ານໂດລາສະຫະຣັດ. ຮອດປີ 2020, ການຂະຫຍາຍຕະຫຼາດພາຍໃນປະເທດອາດຈະບັນລຸເຖິງ5 ຕື້ 890 ລ້ານໂດລາສະຫະລັດ.
ບົດລາຍງານດັ່ງກ່າວໃຫ້ຮູ້ວ່າ, ຄຽງຄູ່ກັບປະຊາກອນຫັນເປັນຜູ້ເຖົ້າໄວຂຶ້ນ, ຄວາມຕ້ອງການດ້ານປິ່ນປົວພະຍາດ, ການສຶກສາ ແລະດ້ານອື່ນໆມີການເພີ່ມຂຶ້ນຢ່າງຫຼວງຫຼາຍ, ມະນຸດກົນຈັກດ້ານການບໍລິການຂອງຈີນມີຕະຫຼາດໃຫຍ່ຫຼວງແລະມີການພັດທະນາຢ່າງແຂງແຮງ ສະນັ້ນ ຈິ່ງຄາດວ່າ ຕະຫຼາດມະນຸດກົນຈັກດ້ານການບໍລິການຂອງຈີນໃນປີ 2017 ຈະບັນລຸມູນຄ່າ 1 ຕື້ 320 ລ້ານໂດລາສະຫະລັດ, ເພີ່ມຂຶ້ນຫຼາຍກວ່າໄລຍະດຽວກັນຂອງປີກາຍ 28%ແລະສູງກວ່າຈັງຫວະການເຕີບໂຕສະເລ່ຍຂອງຕະຫຼາດມະນຸດກົນຈັກດ້ານການບໍລິການຂອງທົ່ວໂລກ.
