ວັນທີ 27 ສິງຫານີ້ ຢູ່ນະຄອນທຽນສິນ, ທ່ານສີຈິ້ນຜິງ ປະທານປະເທດຈີນ ໄດ້ຕ້ອນຮັບການເຂົ້າຢ້ຽມຄຳນັບຂອງສົມເດັດເຊອິກ ອາມັດ ອານ-ຟາຮັດ ອານ-ອາເມັດ ອານ-ຊາບາ ປະທານສະພາມົນຕີໂອລິມປິກອາຊີ ໂອກາດເດີນທາງເຂົ້າຮ່ວມພິທີເປີດມະຫະກຳກິລາແຫ່ງຊາດຈີນຄັ້ງທີ 13 ຢູ່ນະຄອນທຽນສິນ.
ໂອກາດນີ້, ທ່ານສີຈິ້ນຜິງ ໄດ້ສະແດງຄວາມຂອບໃຈສະພາມົນຕີໂອລິມປິກອາຊີ ທີ່ໄດ້ຕັ້ງໜ້າປະກອບສ່ວນຊຸກຍູ້ພາລະກິດການກິລາຈີນ ກໍຄືການກິລາອາຊີ ໃຫ້ພັດທະນາ ທັງເນັ້ນວ່າ: ຈີນຈະສືບຕໍ່ສະໜັບສະໜູນວຽກງານຂອງສະພາມົນຕີໂອລິມປິກອາຊີ. ຂະນະທີ່ປະເທດຕ່າງໆໃນອາຊີບໍ່ພຽງແຕ່ຈະຕ້ອງພັດທະນາແລະຈະເລີນຮຸ່ງເຮືອງຮ່ວມກັນ ກໍຄວນມີຄວາມກ້າວໜ້າຮ່ວມກັນໃນດ້ານການກິລາ.
ສົມເດັດເຊອິກ ອາມັດ ກ່າວວ່າ: ສະພາມົນຕີໂອລິມປິກອາຊີ ແລະຂ້າພະເຈົ້າເອງ ກໍທະນຸຖະໜອມການຮ່ວມມືແລະມິດຕະພາບກັບຈີນ, ຊື່ນຊົມທ່ານປະທານສີຈິ້ນຜິງ ທີ່ເບິ່ງກວ້າງເຫັນໄກໃນການພັດທະນາກິລາຈີນ ແລະ ພາລະກິດໂອລິມປິກສາກົນ ທັງສະແດງຄວາມຂອບໃຈລັດຖະບານຈີນທີ່ໄດ້ສະໜັບສະໜູນວຽກງານຂອງສະພາມົນຕີໂອລິມປິກໃນໄລຍະຜ່ານມານີ້. ຂະນະທີ່ສະພາມົນຕີໂອລິມປິກອາຊີ ກໍຈະສືບຕໍ່ຮັດແໜ້ນການຮ່ວມມືກັບຈີນ ສຸມໃສ່ພັດທະນາພາລະກິດການກິລາອາຊີ, ສະໜັບສະໜູນຈີນເປັນເຈົ້າພາບຈັດມະຫະກຳກິລາໂອລິມປິກລະດູໜາວປັກກິ່ງ 2022 ແລະ ມະຫະກຳກິລາເອຊຽນເກມຫັງໂຈ່ວ.