ໃນພິທີສະຫຼຸບແລະຍ້ອງຍໍຜູ້ດີເດັ່ນໃນການແຂ່ງຂັນ "ຄວາມພະຍາຍາມຮ້ອຍວັນ" ການກໍ່ສ້າງທາງລົດໄຟຈີນ-ລາວຕອນບໍ່ເຕັນ-ວຽງຈັນ ທີ່ຈັດຂຶ້ນຢູ່ນະຄອນຫຼວງວຽງຈັນ ໃນວັນທີ 27 ສິງຫານີ້, ທ່ານຈ້າວສຽງ ຜູ້ອຳນວຍການໃຫຍ່ບໍລິສັດທາງລົດໄຟຈີນ-ລາວຈຳກັດກ່າວວ່າ: ໃນການແຂ່ງຂັນອອກແຮງງານ 100 ວັນຜ່ານມາ, ການກໍ່ສ້າງທາງລົດໄຟຈີນ-ລາວຕອນບໍ່ເຕັນ-ວຽງຈັນ ໄດ້ຄືບໜ້າເປັນຢ່າງດີ ເຊິ່ງຖືວ່າເປັນການແຂ່ງຂັນທີ່ມີປະສິດທິຜົນໃນເບື້ອງຕົ້ນ.
ທ່ານຈ້າວສຽງ ກ່າວວ່າ: ນັບແຕ່ເປີດບັ້ນແຂ່ງຂັນອອກແຮງງານເປັນຕົ້ນມາ, ໜ່ວຍງານຕ່າງໆທີ່ເຂົ້າຮ່ວມແຂ່ງຂັນ ໄດ້ຜ່ານຜ່າຄວາມຫຍຸ້ງຍາກຕ່າງໆນານາ ໂດຍໄດ້ຕັ້ງໜ້າຊຸກຍູ້ການຈັດຕັ້ງປະຕິບັດຂໍ້ຮັບປະກັນຕ່າງໆ ທີ່ປິ່ນອ້ອມເປົ້າໝາຍການກໍ່ສ້າງໂຄງການ ເປັນຕົ້ນ 4 ສະຖານີລົດໄຟເລີ່ມດຳເນີນວຽກດິນແລະປັບພື້ນດິນ; ເລີ່ມກໍ່ສ້າງພື້ນຖານເສົາຂົວ 9 ແຫ່ງ, ເລີ່ມກໍ່ສ້າງປາກອຸໂມງ 46 ແຫ່ງ, ໃນນີ້ມີ 47 ປາກຂອງອຸໂມງ 15 ແຫ່ງໄດ້ຂຸດເຈາະອຸໂມງແລ້ວ ໂດຍສາມາດສຳເລັດລື່ນແຜນ, ຂະນະທີ່ເປົ້າໝາຍຄຸນນະພາບ, ຄວາມປອດໄພ ແລະ ການອະນຸລັກສິ່ງແວດລ້ອມຂອງໂຄງການກໍຢູ່ໃນລະດັບການຄຸ້ມຄອງໂດຍລວມ.
ທ່ານລັດຕະນະມະນີ ຄູນນີວົງ ຮອງລັດຖະມົນຕີກະຊວງໂຍທາທິການແລະຂົນສົ່ງລາວ ໄດ້ຕາງໜ້າລັດຖະບານ ແລະ ໜ່ວຍຄຸ້ມຄອງໂຄງການທາງລົດໄຟຈີນ-ລາວ ສະແດງຄວາມຊົມເຊີຍຕໍ່ໜ່ວຍງານຕ່າງໆ ແລະ ບັນດາພະນັກງານ ທີ່ເຂົ້າຮ່ວມກໍ່ສ້າງ ແລະກ່າວດ້ວຍຄວາມເຊື່ອໝັ້ນວ່າໂຄງການທາງລົດໄຟຈີນ-ລາວ ຈະກໍ່ສ້າງສຳເລັດຕາມແຜນການແລະມີຄຸນນະພາບສູງຕາມເວລາທີ່ກຳນົດໄວ້ຢ່າງແນ່ນອນ.
