ມີນັກຂ່າວຖາມໃນພິທີຖະແຫຼງຂ່າວຂອງກະຊວງປ້ອງກັນປະເທດຈີນໃນວັນທີ 28 ສິງຫານີ້ໂດຍອ້າງຕາມແຫຼ່ງຂ່າວທີ່ລາຍງານວ່າ: ຕາມຄວາມຮຽກຮ້ອງຂອງຈີນ, ອິນເດຍໄດ້ຖອນທະຫານແລະອຸປະກອນທີ່ຂ້າມຊາຍແດນຈີນ-ອິນເດຍຕອນຊີກີມແລະເຂົ້າໃນປະເທດຕົນນັ້ນຄືນໝົດແລ້ວ. ກະຊວງປ້ອງກັນປະເທດຈີນມີຄຳຄິດເຫັນແນວໃດຕໍ່ເລື່ອງນີ້?
ທ່ານອູຊ່ຽນ ໂຄສົກກະຊວງປ້ອງກັນປະເທດຈີນ ກ່າວວ່າ: ນັບແຕ່ວັນທີ 18 ມິຖຸນາຜ່ານມາ, ທະຫານຊາຍແດນອິນເດຍໄດ້ຂ້າມຊາຍແດນລະຫວ່າງສອງປະເທດແລະເຂົ້າໃນເຂດຕົ້ງຫຼາງ ປະເທດຕົນຢ່າງຜິດກົດໝາຍ ອັນເຮັດໃຫ້ສະຖານະການຢູ່ຊາຍແດນສອງປະເທດເຄັ່ງຕຶງຂຶ້ນຢ່າງຕໍ່ເນື່ອງ ເຊິ່ງກອງທັບຈີນຄັດຄ້ານການກະທຳຂອງອິນເດຍຢ່າງເດັດດ່ຽວ ທັງນຳໃຊ້ມາດຕະການແກ້ໄຂໂດຍດ່ວນ ໂດຍໄດ້ເພີ່ມທະວີການຄຸ້ມຄອງແລະຄວບຄຸມເຂດຊາຍແດນ, ຈັດວາງກອງກຳລັງສູ້ຮົບຄືບໄປໜ້າ, ເພີ່ມທະວີການຝຶກຊ້ອມທີ່ມີລັກສະນະຈຸດສຸມ, ປົກປັກຮັກສາອຳນາດອະທິປະໄຕເໜືອແຜ່ນດິນ ແລະ ສິດຜົນປະໂຫຍດຂອງຊາດຢ່າງແຂງແຮງ. ແນວໃດກໍດີ, ສັນຕິພາບແລະຄວາມສະຫງົບຂອງເຂດຊາຍແດນຈີນ-ອິນເດຍໄດ້ກ່ຽວພັນເຖິງສັນຕິພາບແລະສະຖຽນລະພາບຂອງພາກພື້ນ ທັງສອດຄ່ອງກັບຜົນປະໂຫຍດຮ່ວມຂອງປະຊາຊົນສອງຊາດ, ພວກຂ້າພະເຈົ້າຈຶ່ງໄດ້ເຕືອນອິນເດຍຈົ່ງຖອດຖອນບົດຮຽນທາງລົບຈາກເຫດການດັ່ງກ່າວ ໂດຍການເຄົາລົບສົນທິສັນຍາເສັ້ນຊາຍແດນປະຫວັດສາດ ແລະ ຫຼັກການພື້ນຖານຂອງກົດໝາຍສາກົນຢ່າງແທ້ຈິງ, ເດີນຕາມທິດທາງດຽວກັນກັບຈີນ ເພື່ອຮ່ວມກັນປົກປັກຮັກສາສັນຕິພາບແລະຄວາມສະຫງົບຂອງເຂດຊາຍແດນລະຫວ່າງສອງປະເທດ ແລະ ຊຸກຍູ້ການພົວພັນລະຫວ່າງສອງກອງທັບໃຫ້ພັດທະນາຢ່າງປອດໃສ.
ທ່ານອູຊ່ຽນ ກ່າວຕື່ມວ່າ: ໃນໂລກນີ້ຍັງບໍ່ມີຄວາມສະຫງົບເທື່ອ ຈຶ່ງຈຳເປັນຕ້ອງປົກປັກຮັກສາສັນຕິພາບ ແລະກອງທັບຈີນມີຄວາມໝັ້ນໃຈປົກປັກຮັກສາອຳນາດອະທິປະໄຕ, ຄວາມໝັ້ນຄົງ ແລະ ຜົນປະໂຫຍດການພັດທະນາຂອງຊາດ, ມີຄວາມໝັ້ນໃຈ ແລະກໍມີຄວາມສາມາດປະກອບສ່ວນປົກປັກຮັກສາສັນຕິພາບຂອງໂລກໄດ້ຢ່າງໃຫຍ່ຫຼວງກວ່າເກົ່າ.