ທ່ານຫວາງເຫຼີຍ ຫົວໜ້າສຳນັກເລຂາງານວາງສະແດງສິນຄ້າຈີນ-ອາຊຽນ ໄດ້ໃຫ້ສຳພາດຕໍ່ສື່ມວນຊົນໃນວັນທີ 28 ສິງຫານີ້ວ່າ: ງານວາງສະແດງສິນຄ້າຈີນ-ອາຊຽນຄັ້ງທີ 14 ປີນີ້ ຈະໄດ້ຕ້ອນຮັບຄະນະຜູ້ແທນທາງການຂັ້ນສູງຂອງຫຼາຍປະເທດ ຈາກອາຊຽນ ແລະ ກາຊັກສະຖານ ເປັນຕົ້ນ, ຂະນະທີ່ສົມເດັດຮາຈີ ຮາຊານາວ ໂບນເກຍ ຊຸນຕານບຣູໄນ, ທ່ານຮຸນແຊນ ນາຍົກລັດຖະມົນຕີກຳປູເຈຍ ຢືນຢັນແລ້ວວ່າຈະເດີນທາງເຂົ້າຮ່ວມງານວາງສະແດງດັ່ງກ່າວ.
ຂ່າວລາຍງານວ່າ: ງານວາງສະແດງສິນຄ້າຈີນ-ອາຊຽນຄັ້ງທີ 14 ຈະເນັ້ນ "ຮ່ວມກັນສ້າງເສັ້ນທາງສາຍໄໝທາງທະເລສະຕະວັດທີ 21, ການທ່ອງທ່ຽວຊ່ວຍຊຸກຍູ້ການເຊື່ອມໂຍງເສດຖະກິດໃນພາກພື້ນ" ແລະຈະຈັດຂຶ້ນຢູ່ເມືອງນານນິງ ສປ ຈີນແຕ່ວັນທີ 12-15 ກັນຍາໜ້ານີ້ ໂດຍ ບຣູໄນ ເປັນປະເທດກິດຕິມະສັກ. ໃນງານວາງສະແດງຄັ້ງນີ້ ຈະມີຫຼາຍຈຸດທີ່ໜ້າສົນໃຈ ເປັນຕົ້ນ ເນື້ອທີ່ງານວາງສະແດງຈະຂະຫຍາຍກວ້າງອອກເຖິງ 1 ແສນ 2 ໝື່ນ 4000 ຕາແມັດ, ມີບ່ອນວາງສະແດງເຖິງ 6600 ບ່ອນ, ຂະນະທີ່ລາວ, ອິນໂດເນເຊຍ, ມາເລເຊຍ, ກຳປູເຈຍ, ໄທ, ບຣູໄນ, ຫວຽດນາມ ແລະ ມຽນມາ ຈະເໝົາຮ້ານວາງສະແດງ; ຂະນະດຽວກັນຈະກຳນົດເຂດວາງສະແດງອຸປະກອນສະມາດສະເພາະ ແລະ ເຂດວາງສະແດງ "ໜຶ່ງແລວທາງໜຶ່ງເສັ້ນທາງ" ສະເພາະ ເພື່ອຊຸກຍູ້ການຫັນປ່ຽນ ແລະ ຍົກລະດັບອຸດສາຫະກຳຈີນ-ອາຊຽນ ທັງລົງເລິກການຮ່ວມມືແລະແລກປ່ຽນກັບປະເທດນອກພາກພື້ນ.