ວັນທີ 29 ສິງຫານີ້, ທ່ານຫຼິວເຈຢີ່ ຜູ້ຕາງໜ້າຖາວອນຂອງຈີນປະຈຳອົງການສະຫະປະຊາຊາດ ໄດ້ປາໄສໃນກອງປະຊຸມອະພິປາຍທົ່ວໄປກ່ຽວກັບບັນຫາການຮັກສາສັນຕິພາບຂອງສະພາຄວາມໝັ້ນຄົງອົງການສະຫະປະຊາຊາດ ໂດຍໄດ້ຊີ້ແຈງຫຼັກໝັ້ນຂອງຈີນ ແລະ ຊີ້ວ່າ: 4 ວຽກງານຂອງອົງການສະຫະປະຊາຊາດ ຄື ການປ້ອງກັນລ່ວງໜ້າເພື່ອບໍ່ໃຫ້ເກີດການປະທະກັນ, ການຮັກສາສັນຕິພາບ, ການສ້າງສັນຕິພາບ ແລະ ສັນຕິພາບຖາວອນ ກໍຈະເນັ້ນໜັກໃນໄລຍະທີ່ຕ່າງກັນ ທັງມີສ່ວນກ່ຽວຂ້ອງແລະເຊື່ອມຈອດກັນ ຈຶ່ງຈະຕ້ອງກຳແໜ້ນໂດຍລວມ.
ທ່ານຫຼິວເຈຢີ່ ໄດ້ສະເໜີການຮັກສາແລະການສ້າງສັນຕິພາບ 4 ຂໍ້ ຄືດັ່ງນີ້:
ໜຶ່ງ, ການປ້ອງກັນລ່ວງໜ້າເພື່ອບໍ່ໃຫ້ເກີດການປະທະກັນ ຈະຕ້ອງຖືເອົາການຮັກສາສັນຕິພາບ ແລະ ສະຖຽນລະພາບ ເປັນເປົ້າໝາຍ ແລະນຳໃຊ້ມາດຕະການຢ່າງມີຈຸດສຸມ ໂດຍອີງຕາມສະພາບການປະທະກັນແລະຕົ້ນປາຍສາເຫດຂອງມັນ.
ສອງ, ການເຄື່ອນໄຫວຮັກສາສັນຕິພາບຂອງອົງການສະຫະປະຊາຊາດ ຄວນເຄົາລົບຈຸດປະສົງ, ຫຼັກການຂອງ "ກົດບັດສະຫະປະຊາຊາດ ແລະ 3 ຫຼັກການຂອງການເຄື່ອນໄຫວຮັກສາສັນຕິພາບ, ກຳນົດການມອບສິດໃຫ້ຈະແຈ້ງ, ປະຕິບັດໄດ້ ແລະ ມີຈຸດສຳຄັນພົ້ນເດັ່ນ ໂດຍອີງຕາມສະພາບທີ່ລະອຽດຈະແຈ້ງຂອງປະເທດເປົ້າໝາຍ, ພິຈາລະນາເຖິງປັດໄຈຕ່າງໆ ເປັນຕົ້ນ ຄວາມຕ້ອງການ ແລະ ສະພາບແວດລ້ອມຄວາມໝັ້ນຄົງຂອງປະເທດເປົ້າໝາຍ.
ສາມ, ການສ້າງສັນຕິພາບ ຄວນຖືເອົາການເພີ່ມທະວີການກໍ່ສ້າງຄວາມໝັ້ນຄົງທາງການເມືອງ ແລະ ການພັດທະນາຄວາມສາມາດ ເປັນເປົ້າໝາຍລວມ ແລະຫັນສະພາບການປະທະກັນໄປສູ່ການຟື້ນຟູການສ້າງສາແລະພັດທະນາຄືນໃໝ່ ແລະຂໍ້ສຸດທ້າຍ ຄື ສັນຕິພາບຖາວອນ ແລະ ການພັດທະນາແບບຍືນຍົງ ເຊິ່ງຈະອາໄສແລະຍູ້ໜູນກັນ ໂດຍຄວນເນັ້ນໜັກການພັດທະນາແລະຄວາມໝັ້ນຄົງຄວບຄູ່ກັນ, ແກ້ໄຂບັນຫາການປະທະກັນໃຫ້ເຖິງກົກເຖິງຮາກ. ການເຮັດແບບນີ້ ຈຶ່ງຈະສາມາດຮັບປະກັນໃຫ້ມີສັນຕິພາບຕໍ່ເນື່ອງ.
