ຕາມຂ່າວ CRI: ໃນພິທີຖະແຫຼງຂ່າວທີ່ຈັດຂຶ້ນໃນວັນທີ 29 ສິງຫານີ້, ທ່ານນາງຮ້ວາຊຸ່ນຢິງ ໂຄສົກກະຊວງການຕ່າງປະເທດຈີນກ່າວວ່າ, ຈີນແລະປະເທດເຂດທະເລຈີນໃຕ້ຈະສືບຕໍ່ຮັກສາການເຈລະຈາແລະການຮ່ວມມື, ທັງກະກຽມໃຫ້ແກ່ການປຶກສາຫາລື "ກົດແຫ່ງການປະພຶດຢູ່ທະເລຈີນໃຕ້" ຫຼື COC ໃນຕໍ່ໜ້າ.
ທ່ານນາງຮ້ວາຊຸ່ນຢິງ ກ່າວວ່າ, ຈີນແລະປະເທດໃນອາຊຽນຈະຈັດກອງປະຊຸມໜ່ວຍງານປະສົມຄັ້ງທີ 22 ຢູ່ນະຄອນຫຼວງມະນີລາປະເທດຟີລິບປີນກ່ຽວກັບການປະຕິບັດ "ຖະແຫຼງການ ແຫ່ງການປະພຶດຂອງບັນດາຝ່າຍໃນທະເລຈີນໃຕ້" ໃນວັນທີ 30 ສິງຫານີ້. ໂດຍຈະແລກປ່ຽນຄວາມເຫັນກ່ຽວກັບການປະຕິບັດ "ຖະແຫຼງການ", ຊຸກຍູ້ການຮ່ວມມືທາງທະເລແລະການປຶກສາຫາລື"ກົດແຫ່ງການປະພຶດຢູ່ທະເລຈີນໃຕ້" ແລະອື່ນໆໃຫ້ເລິກເຊິ່ງ.
ທ່ານນາງຮ້ວາຊຸ່ນຢິງກ່າວຕື່ມວ່າ: "ຈາກຄວາມພະຍາຍາມຮ່ວມກັນຂອງຈີນແລະປະເທດທີ່ກ່ຽວຂ້ອງ, ປັດຈຸບັນສະຖານະການທະເລຈີນໃຕ້ໄດ້ຄ່ອຍໆ, ມີທ່າອຽງດີຂຶ້ນຢ່າງບໍ່ຢຸດຢັ້ງ. ຝ່າຍຕ່າງໆທີ່ກ່ຽວຂ້ອງໄດ້ກັບຄືນສູ່ເສັ້ນທາງການເຈລະຈາຄືນໃໝ່, ສຸມໃສ່ຈັດຕັ້ງປະຕິບັດຖະແຫຼງການຢ່າງຮອບດ້ານແລະມີປະສິດທິຜົນ. ໂດຍຜ່ານການຄວບຄຸມຄວາມຂັດແຍ້ງກັນ, ເພີ່ມຄວາມໄວ້ເນື້ອເຊື່ອໃຈ, ຊຸກຍູ້ການຮ່ວມມື, ຮ່ວມກັນຮັກສາສັນຕິພາບແລະສະຖຽນລະພາບຂອງທະເລຈີນໃຕ້. ບັນດາຝ່າຍຈະສືບຕໍ່ຮັກສາທ່າອຽງເຈລະຈາແລະການຮ່ວມມື, ພະຍາຍາມຕັ້ງໜ້າສ້າງຜົນງານໃຫ້ຄືບໜ້າຫຼາຍກວ່າເກົ່າ, ເພື່ອກະກຽມການປຶກສາຫາລືກົດແຫ່ງການປະພຶດຢູ່ທະເລຈີນໃຕ້ໃນຕໍ່ໜ້າ" ໃຫ້ໄດ້ເປັນຢ່າງດີ.
 |
