ວັນທີ 30 ສິງຫານີ້, ທ່ານນາງຮ້ວາຊູ່ນຢີງ ໂຄສົກກະຊວງການຕ່າງປະເທດຈີນໄດ້ກ່າວໃນການຖະແຫຼງຂ່າວວ່າ, ໃນການແກ້ໄຂບັນຫາແຫຼມເກົາຫຼີນັ້ນ, ຈີນເນັ້ນຊຸກຍູ້ໃຫ້ແຫຼມເກົາຫຼີປອດນິວເຄຼຍ, ຮັກສາລະບຽບການບໍ່ແຜ່ຂະຫຍາຍອາວຸດນິວເຄຼຍສາກົນ ແລະປັກປ້ອງສັນຕິພາບແລະສະຖຽນລະພາບຂອງແຫຼມເກົາຫຼີຢ່າງສະເໝີຕົ້ນສະເໝີປາຍ. ຂະນະດຽວກັນກໍ່ຖືສຳຄັນຈັດຕັ້ງປະຕິບັດມະຕິທີ່ກ່ຽວຂ້ອງຂອງສະພາຄວາມໝັ້ນຄົງສະຫະປະຊາຊາດຢ່າງຮອບດ້ານແລະຄົບຊຸດ. ພວກຂ້າພະເຈົ້າໄດ້ຕັ້ງໜ້າເສີມຂະຫຍາຍບົດບາດເທົ່າທີ່ມີແລະສະເໝີຕົ້ນສະເໝີປາຍດ້ວຍຫຼັກໝັ້ນຢ່າງພາວະວິໄສແລະທ່ຽງທຳມາໂດຍຕະຫຼອດ.
ຕໍ່ກໍລະນີທີ່ໃຫ້ຈີນຄວນໃຊ້ກຳລັງໜີບສປປເກົາຫຼີເພື່ອແກ້ໄຂບັນຫານິວເຄຼຍຂອງແຫຼມເກົາຫຼີນັ້ນ, ທ່ານນາງຮ້ວາຊູ່ນຢີງໄດ້ຊີ້ໃຫ້ເຫັນວ່າ: "ການປະກາດລົງໂທດເປັນຈຸດໜັກ, ຕ້ອງການຊຸກຍູ້ການເຈລະຈາສັນຕິພາບເປັນສຳຮອງ, ບໍ່ຢາກແບກຫາບໜ້າທີ່ຮັບຜິດຊອບໃດໆ, ຂໍພຽງແຕ່ໄດ້ຮັບຜົນປະໂຫຍດເທົ່ານັ້ນ, ນັ້ນຖືວ່າບໍ່ແມ່ນທ່າທີແລະການກະທຳທີ່ສົມເຫດສົມຜົນຂອງປະເທດທີ່ມີຄວາມຮັບຜິດຊອບ. ຄວາມເປັນຈິງນັ້ນ, ທາດແທ້ຂອງບັນຫາແຫຼມເກົາຫຼີຄືບັນຫາຄວາມໝັ້ນຄົງ, ກະແຈເປີດປະຕູສູ່ການແກ້ໄຂບັນຫາແຫຼມເກົາຫຼີໂດຍສັນຕິ ຢູ່ໃນມືຂອງຝ່າຍທີ່ກ່ຽວຂ້ອງໂດຍກົງຄື ສປປເກົາຫຼີກັບອາເມລິກາ ສປປເກົາຫຼີກັບສ.ເກົາຫຼີ. ຖ້າວ່າພວກເຂົາພຽງແຕ່ຖືກະແຈຊື່ໆ, ກ້າວໄປພຽງກ້າວດຽວ, ຖອຍຫຼັງຄືນ 3 ກ້າວ, ແລະບໍ່ຍອມເປີດປະຕູນັ້ນ ຈະມີຜູ້ໃດເປັນຫ່ວງສ່ຳໃດ ກໍບໍ່ໄດ້ຜົນຫຍັງເລີຍ."