ຂະນະທີ່ກອງປະຊຸມພົບປະລະຫວ່າງຜູ້ນຳປະເທດບຣິກສ ຈະຈັດຂຶ້ນຢູ່ເມືອງເຊ້ຍເໝິນ ສປ ຈີນໃນໄວໆນີ້, ທ່ານວະລາດີເມຍ ປູຕິນ ປະທານາທິບໍດີຣັດເຊຍ ໄດ້ຂຽນບົດຄວາມຕາມທັດສະນະຂອງຕົນຕໍ່ອະນາຄົດຂອງການຮ່ວມມືລະຫວ່າງປະເທດບຣິກສ.
ທ່ານປູຕິນ ໄດ້ລະບຸໃນບົດຄວາມທີ່ພາດຫົວ "ປະເທດບຣິກສ--ເປີດສາຍຕາໃໝ່ແຫ່ງສາຍພົວພັນຄູ່ຮ່ວມຍຸດທະສາດ" ນັ້ນວ່າ: ໃນຖານະເປັນປະທານໝຽນວຽນປະເທດບຣິກສ, ຈີນປະຕິບັດໜ້າທີ່ຢ່າງມີປະສິດທິພາບສູງ ສົ່ງຜົນເຮັດໃຫ້ປະເທດບຣິກສ ປະສົບຜົນສຳເລັດໃນການຮ່ວມມືຕົ້ນຕໍ ເປັນຕົ້ນ ການເມືອງ, ເສດຖະກິດ ແລະ ວັດທະນະທຳ. ນອກນີ້, 5 ປະເທດບຣິກສ ກໍມີບົດບາດສູງຂຶ້ນຢ່າງຈະແຈ້ງໃນໂລກ. ສິ່ງສຳຄັນກໍຄື ກົນໄກການຮ່ວມມືຂອງບຣິກສ ໄດ້ສ້າງຂຶ້ນບົນຫຼັກການຄວາມສະເໝີພາບ, ເຄົາລົບເຊິ່ງກັນແລະກັນ, ພິຈາລະນາທັດສະນະຂອງຝ່າຍອື່ນ ແລະ ເປັນເອກະພາບກັນ.
ທ່ບົດຄວາມຍັງສ່ອງແສງໃຫ້ເຫັນຕື່ມວ່າ: ຣັດເຊຍໃຫ້ຄວາມສຳຄັນສູງ ແລະ ທະນຸຖະໜອມການປະສານງານຫຼາຍຝ່າຍໃນຂອບ 5 ປະເທດບຣິກສ ດ້ວຍຈຸດຢືນຄື ເຮັດໃຫ້ປະເທດບຣິກສ ນຳໃຊ້ນະໂຍບາຍການປະສານງານການຕ່າງປະເທດທີ່ແໜ້ນແຟ້ນກວ່າເກົ່າ ໂດຍສະເພາະໃນອົງການສະຫະປະຊາຊາດ, ກຸ່ມ 20 ປະເທດ ແລະອົງການຈັດຕັ້ງສາກົນອື່ນໆ.
ຂະນະດຽວກັນ, ຣັດເຊຍກໍມີຈຸດຢືນໃຫ້ເປີດກວ້າງການຮ່ວມມືລະຫວ່າງປະເທດບຣິກສ ເພື່ອຄວາມປອດໄພດ້ານຂໍ້ມູນຂ່າວສານທົ່ວໂລກ ໂດຍສະເໜີໃຫ້ຮ່ວມກັນວາງຂອບຮ່ວມມືກົດໝາຍສາກົນທີ່ສົມຄູ່ກັນ, ສ້າງແລະນຳໃຊ້ຫຼັກການການປະຕິບັດທົ່ວໄປທີ່ມີຄວາມຮັບຜິດຊອບໃນຂົງເຂດດັ່ງກ່າວຂອງບັນດາປະເທດ.
ທ່ານປູຕິນຂຽນມ້ວນທ້າຍບົດຄວາມໂດຍເຊື່ອໝັ້ນວ່າ: ກອງປະຊຸມພົບປະເຊ້ຍເໝິນ ຈະຊຸກຍູ້ບັນດາປະເທດເປັນເຈົ້າການຮັບມືກັບສິ່ງທ້າທາຍຕ່າງໆໃນສະຕະວັດທີ 21 ແລະ ຊຸກຍູ້ການປະສານງານລະຫວ່າງ 5 ປະເທດໃຫ້ຂຶ້ນສູ່ລະດັບໃໝ່.