ຕອນຄ່ຳວັນທີ 30 ສິງຫາຜ່ານມາ, ຄະນະກຳມະການຖະແຫຼງຂ່າວຂອງສຳນັກງານທີ່ປຶກສາແຫ່ງລັດມຽນມາໄດ້ແຈ້ງສະພາບລັດຍະໄຂ່ຖືກໂຈມຕີວ່າ: ມາຮອດວັນທີ 29 ສິງຫາຜ່ານມາ, ມີທະຫານ 1 ຄົນ, ຕຳຫຼວດ 11 ຄົນ, ເຈົ້າໜ້າທີ່ໜ່ວຍກວດຄົນເຂົ້າເມືອງ 1 ຄົນແລະປະຊາຊົນທົ່ວໄປ 12 ຄົນລວມ 25 ຄົນເສຍຊີວິດ ແລະອີກ 18 ຄົນບາດເຈັບ ໃນນີ້ມີຕຳຫຼວດ 12 ຄົນ.
ຕອນຂ້ອນແຈ້ງວັນທີ 25 ສິງຫາຜ່ານມາ, ຢູ່ຫຼາຍແຫ່ງຂອງລັດຍະໄຂ່ຂອງມຽນມາໄດ້ເກີດເຫດການໂຈມຕີຫຼາຍເທື່ອແລະທະຫານແລະຕຳຫຼວດທ້ອງຖິ່ນຂອງມຽນມາໄດ້ດຳເນີນການຈັບກຸມແລະຕ້ານການເຄື່ອນໄຫວກໍ່ການຮ້າຍ ໂດຍໄດ້ປະທະກັບກຸ່ມປະກອບອາວຸດທ້ອງຖິ່ນຫຼາຍເທື່ອ, ເຊິ່ງເຮັດໃຫ້ຜູ້ກໍ່ການຮ້າຍຢ່າງໜ້ອຍເສຍຊີວິດ 77 ຄົນ ແລະຈັບໄດ້ 2 ຄົນ.
ຂະນະທີ່ໃນວັນທີ 31 ສິງຫາຜ່ານມາ, ທ່ານນາງ ຮວ້າຊຸ່ນຢີງ ໂຄສົກກະຊວງການຕ່າງປະເທດຈີນກ່າວວ່າ: ຫຼັງພວກຂ້າພະເຈົ້າໄດ້ເຫັນຖະແຫຼງການ ຂອງລັດຖະບານມຽນມາ. ກໍໄດ້ກ່າວປະນາມຕໍ່ເຫດໂຈມຕີດ້ວຍຄວາມຮຸນແຮງຢູ່ລັດຍະໄຂ່ ແລະສະແດງຄວາມເສຍໃຈຕໍ່ຜູ້ເສຍຊີວິດ ແລະເຫັນໃຈຕໍ່ປະຊາຊົນຜູ້ປະສົບເຄາະຮ້າຍແລະຜູ້ບາດເຈັບ. ໃນຖານະເປັນປະເທດບ້ານໃກ້ຄຽງທີ່ດີ, ຈີນສະໜັບສະໜູນມຽນມາທີ່ໄດ້ສຸມທຸກຄວາມພະຍາຍາມປົກປັກຮັກສາສັນຕິພາບແລະສະຖຽນລະພາບຂອງລັດຍະໄຂ່ ແລະຫວັງວ່າມຽນມາຈະສາມາດຮັກສາຄວາມໝັ້ນຄົງທາງສັງຄົມ,ຄວາມສາມັກຄີປອງດອງຂອງຊົນຊາດແລະການພັດທະນາເສດຖະກິດ.
 |
