ໃນການຖະແຫຼງຂ່າວທີ່ຈັດຂຶ້ນຢູ່ປັກກິ່ງໃນວັນທີ 31 ສິງຫາຜ່ານມາ, ທ່ານນາງ ຮວ້າຊຸ່ນຢີງ ໂຄສົກກະຊວງການຕ່າງປະເທດຈີນໄດ້ຕອບຄຳຖາມຂອງນັກຂ່າວຕໍ່ກໍລະນີທີ່ຈີນຈະຮຽກຮ້ອງໃຫ້ອິນໂດເນເຊຍຢຸດການເຈລະຈາກ່ຽວກັບການຂີດແບ່ງເສັ້ນທະເລກັບຫວຽດນາມຫຼືບໍ່.
ນັກຂ່າວຖາມວ່າ: "ຈີນຈະຮຽກຮ້ອງໃຫ້ອິນໂດເນເຊຍຢຸດການເຈລະຈາກ່ຽວກັບການຂີດແບ່ງເສັ້ນທະເລກັບຫວຽດນາມ ແລະຢຸດການເອີ້ນເຂດທະເລສ່ວນໜຶ່ງຂອງທະເລຈີນໃຕ້ເປັນ "ທະເລນາຕູນາເໜືອ" ຫຼືບໍ່?
ທ່ານນາງ ຮວ້າຊຸ່ນຢີງ ກ່າວວ່າ: ຂ້າພະເຈົ້າຂໍຢ້ຳເຖິງຫຼັກໝັ້ນແລະຫຼັກການຂອງຈີນໃນບັນຫາທະເລຈີນໃຕ້. ກ່ຽວກັບບັນຫາຄວາມຂັດແຍ້ງກັນດ້ານອະທິປະໄຕເໜືອດິນແດນແລະການຂີດແບ່ງເສັ້ນທະເລລະຫວ່າງຈີນກັບບາງປະເທດສະມາຊິກອາຊຽນນັ້ນ, ພວກຂ້າພະເຈົ້າຍິນດີສຸມໃສ່ແກ້ໄຂບັນຫາຢ່າງເໝາະສົມດ້ວຍການປຶກສາຫາລືແລະການເຈລະຈາລະຫວ່າງສອງຝ່າຍມາໂດຍຕະຫຼອດ. ຂະນະດຽວກັນ, ກໍຍິນດີຮ່ວມກັບອາຊຽນປົກປັກຮັກສາສັນຕິພາບແລະສະຖຽນລະພາບຂອງເຂດທະເລຈີນໃຕ້.ສ່ວນບັນຫາລະອຽດໃນກໍລະນີດັ່ງກ່າວ,ພວກຂ້າພະເຈົ້າຫວັງຢາກໃຫ້ປະເທດທີ່ກ່ຽວຂ້ອງປະຕິບັດດ້ວຍຄວາມສຸຂຸມຮອບຄອບບົນພື້ນຖານການພົວພັນລະຫວ່າງຈີນກັບປະເທດອາຊຽນກໍຄືການປົກປັກຮັກສາສັນຕິພາບແລະສະຖຽນລະພາບຂອງເຂດທະເລຈີນໃຕ້.
 |
