ຕາມຂ່າວCRI:ວັນທີ 1 ກັນຍານີ້, ທ່ານສີຈິ້ນຜີງ, ປະທານປະເທດຈີນໄດ້ພົບປະກັບທ່ານມີເຊນ ເຕເມນ, ປະທານາທິບໍດີເບຼຊີນທີ່ໄດ້ເດີນທາງມາຢ້ຽມຢາມຈີນຢູ່ນະຄອນຫຼວງປັກກິ່ງ. ສອງຝ່າຍກ່າວເນັ້ນຢ່າງເປັນເອກະສັນກັນວ່າ, ຢູ່ເບື້ອງຫຼັງທີ່ສະຖານະການສາກົນໃນປັດຈຸບັນນີ້ມີປັດໄຈບໍ່ສະຫງົບຫຼາຍກວ່າເກົ່າ, ໃນຖານະທີ່ເປັນປະເທດກຳລັງພັດທະນາໃຫຍ່ທີ່ສຸດໃນໂລກເບື້ອງຕາເວັນອອກແລະໂລກເບື້ອງຕາເວັນຕົກ, ຈີນກັບເບຼຊີນຄວນເພີ່ມທະວີການປະສານງານ, ເຮັດໃຫ້ການຮ່ວມມືລະຫວ່າງສອງປະເທດກາຍເປັນແບບຢ່າງທີ່ດີດ້ານການຮ່ວມມືລະຫວ່າງປະເທດທີ່ເປັນຕະຫຼາດຈະເລີນໃໝ່. ສອງປະເທດຍິນດີພະຍາຍາມຮ່ວມກັນເພື່ອຊຸກຍູ້ໃຫ້ການພົວພັນຄູ່ຍຸດທະສາດຮອບດ້ານລະຫວ່າງສອງປະເທດໄດ້ມີການພັດທະນາໃໝ່ຢ່າງໃຫຍກວ່າເກົ່າ.
ໃນສາຍຕາຂອງຜູ້ນຳຈີນແລະເບຼຊີນ, ການຮ່ວມມືລະຫວ່າງສອງປະເທດບໍ່ພຽງແຕ່ຢູ່ໃນຂົງເຂດສອງຝ່າຍເທົ່ານັ້ນ. ໃນຖານະທີ່ເປັນຕົວແທນສຳຄັນຂອງປະເທດຕະຫຼາດຈະເລີນໃໝ່, ການແລກປ່ຽນແລະການປະສານງານໃນຂົງເຂດຫຼາຍຝ່າຍລະຫວ່າງຈີນກັບເບຼຊີນກໍມີຄວາມໝາຍທີ່ສຳຄັນ. ໃນການເຈລະຈາວັນທີ 1 ກັນຍານີ້, ທ່ານສີ້ຈິນຜີງກໍກ່າວເນັ້ນວ່າ, ຈີນປະຕິບັດຕໍ່ແລະຂະຫຍາຍການພົວພັນກັບເບຼຊີນຈາກດ້ານຍຸດທະສາດແລະໂດຍຕະຫຼອດ. ທ່ານມີເຊນ ເຕເມນກໍກ່າວວ່າ, ການພົວພັນຄູ່ຍຸດທະສາດລະຫວ່າງເບຼຊີນກັບຈີນມີຄວາມໝາຍສຳຄັນດ້ານຍຸດທະສາດຕໍ່ສອງປະເທດກໍຄືທົ່ວໂລກ.