ຕອນບ່າຍວັນທີ 3 ກັນຍານີ້, ກອງປະຊຸມເວທີປຶກສາຫາລືອຸດສາຫະກຳການຄ້າປະເທດເບຣິກສ໌ທີ່ມີຂະໜາດໃຫຍ່ທີ່ສຸດໃນປະຫວັດສາດອົງການເບຣິກສ໌ໄດ້ຈັດຂຶ້ນຢູ່ເມືອງເຊ້ຍເໝິນປະເທດຈີນ. ທ່ານສີຈິ້ນຜີງ ປະທານປະເທດຈີນເຂົ້າຮ່ວມພິທີໄຂປະຊຸມແລະກ່າວປາຖະກະຖາ, ທົບທວນຄືນຂະບວນການພັດທະນາ 10 ປີຂອງປະເທດເບຣິກສ໌, ຖອດຖອນບົດຮຽນການຮ່ວມມືລະຫວ່າງປະເທດເບຣິກສ໌, ພ້ອມທັງຈ້ອງມອງພາບອະນາຄົດແຫ່ງການພັດທະນາ. ທ່ານມິເຊີ ເທເມີ ປະທານາທິບໍດີເບຼຊິນ, ທ່ານຈາກົບ ຈູມາ ປະທານາທິບໍດີອາຟຣິກາໃຕ້ແລະຜູ້ນຳປະເທດອື່ນໆຈະເຂົ້າຮ່ວມເວທີປຶກສາຫາລືດັ່ງກ່າ, ກ່າວປາຖະກະຖາຫຼືເຂົ້າຮ່ວມການປຶກສາຫາລື.
ເວທີປຶກສາຫາລືອຸດສາຫະກຳການຄ້າຄັ້ງນີ້ຈະເນັ້ນ 4 ຫົວຂໍ້ຄື: "ການຄ້າແລະການລົງທຶນ",
"ການຮ່ວມມືແລະພັດທະນາດ້ານການເງິນ", "ການເຊື່ອມຈອດກັນ" ແລະ "ເສດຖະກິດທາງທະເລ". ຜູ້ຮ່ວມປະຊຸມມີຜູ້ນຳຂອງປະເທດເບຣິກສ໌ແລະຜູ້ນຳຂອງປະເທດທີ່ໄດ້ຮັບຄຳເຊີນ, ຍັງມີຜູ້ຮັບຜິດຊອບຈາກອົງການພັດທະນາອຸດສາຫະກຳຂອງອົງການສະຫະປະຊາຊາດ, ທະນາຄານພັດທະນາໃໝ່ຂອງປະເທດເບຣິກສ໌ແລະອົງການຈັດຕັ້ງສາກົນອື່ນໆ, ຍອດຈຳນວນຜູ້ຮ່ວມປະຊຸມຈະບັນລຸເຖິງ 1200 ຄົນ, ໃນນັ້ນມີຜູ້ຕາງໜ້າອຸດສາຫະກຳການຄ້າ 1069 ຄົນຈາກ 25 ປະເທດ, ຫຼາຍກວ່າເວທີປຶກສາຫາລືທຸກຄັ້ງທີ່ຜ່ານມາ. ຂະນະດຽວກັນນັ້ນ, ວິສາຫະກິດທີ່ຮ່ວມປະຊຸມລວມທັງ 79 ວິສາຫະກິດທີ່ນອນຢູ່ໃນ 500 ວິສາຫະກິດເຂັ້ມແຂງໃນໂລກແລະ 115 ວິສາຫະກິດຈີນທີ່ເປັນ 500 ວິສາຫະກິດເຂັ້ມແຂງຂອງຈີນ.