ວັນທີ 3 ກັນຍານີ້, ກອງປະຊຸມສົ່ງເສີມນັກທຸລະກິດເຂົ້າລົງທຶນຢູ່ເຂດເສດຖະກິດພິເສດສະຫວັນເຊໂນແລະແຂວງສະຫວັນນະເຂດໄດ້ຈັດຂຶ້ນຢູ່ນະຄອນຫຼວງປັກກິ່ງ ສປ ຈີນ. ທ່ານ ລຽງໄຮຢາງ ປະທານບໍລິຫານງານຂອງສະຫະພັນການຄ້າຊາວຈີນຕ່າງດ້າວແລະຊາວຕ່າງປະເທດເຊື້ອສາຍຈີນໃນໂລກ ຫົວໜ້າຄະນະຢ້ຽມຢາມລາວເພື່ອວັດທະນະທຳແລະການຮ່ວມມືສາກົນໜຶ່ງແລວທາງໜຶ່ງເສັ້ນທາງກໍຄືຜູ້ຕາງໜ້ານັກທຸລະກິດ, ທ່ານດຣ ຈັນເພັງ ສຸທິວົງ ເລຂາສູນກາງແນວລາວສ້າງຊາດ ສປປ ລາວໄດ້ນຳພາຄະນະເຂົ້າຮ່ວມ.
ທ່ານ ລຽງໄຮຢາງ ໃຫ້ຮູ້ວ່າ: ເພື່ອປະສົມປະສານແລະຊຸກຍູ້ "ການຮ່ວມມືສາກົນໜຶ່ງແລວທາງໜຶ່ງເສັ້ນທາງ" ໃຫ້ດີກວ່າເກົ່າ, ຈີນແລະລາວໄດ້ຕົກລົງຈະຮ່ວມກັນຈັດ "ຄະນະຢ້ຽມຢາມລາວເພື່ອວັດທະນະທຳແລະການຮ່ວມມືສາກົນໜຶ່ງແລວທາງໜຶ່ງເສັ້ນທາງເຂົ້າສູ່ ສປປ ລາວ"ໃນວັນທີ 23 ຫາວັນທີ 28 ກັນຍານີ້ ໂດຍຍັງຈະຈັດງານວາງສະແດງແລະກອງປະຊຸມປຶກສາຫາລືທີ່ກ່ຽວຂ້ອງຢູ່ນະຄອນຫຼວງວຽງຈັນ ສປປ ລາວ ເພື່ອນຳເອົາຜົນງານສິລະປະຫຼາຍກວ່າ 80 ລາຍການໄປວາງສະແດງ ແລະຄາດວ່າ, ໂຄງການທີ່ສຳຄັນແລະໃຫຍ່ທີ່ໃນການຈັບຄູ່ລົງທຶນແລະການເຊັນບົດບັນທຶກການຮ່ວມມືດ້ານການລົງທຶນຈະມີຫຼາຍກວ່າ 50 ໂຄງການ ໂດຍມີຍອດມູນຄ່າການລົງທຶນ ຫຼາຍກວ່າ 30 ຕື້ຢວນ.
ທ່ານດຣ. ຈັນເພັງ ສຸທິວົງ ກ່າວໂດຍເຊື່ອໝັ້ນວ່າຫຼັງກອງປະຊຸມດັ່ງກ່າວໃນວັນທີ 23 ຫາວັນທີ 28 ກັນຍານີ້, ຈະບັນທຶກໜ້າປະຫວັດສາດໃໝ່ໃຫ້ແກ່ແຜນການແລະຍຸດທະສາດການເງິນສະບັບໃໝ່ຂອງພາກພື້ນແມ່ນ້ຳຂອງ.
ໃນການຖະແຫຼງຂ່າວ, ທ່ານດຣ. ຈັນເພັງ ສຸທິວົງໄດ້ມອບກະແຈຄຳທີ່ເປັນສັນຍະລັກຂອງຄວາມ "ຍິນດີຕ້ອນຮັບເຂົ້າສູ່ ສປປ ລາວ ເປີດປະຕູປະເທດລາວ" ໃຫ້ແກ່ທ່ານ ລຽງໄຮຢາງ ຫົວໜ້າຄະນະຢ້ຽມຢາມຝ່າຍຈີນ. ແລະນັກສິລະປິນຈີນໄດ້ມອບສິລະປະຮູບແຕ້ມຈີນໃຫ້ແກ່ລັດຖະບານລາວ, ອົງການປົກຄອງແຂວງສະຫວັນນະເຂດແລະຜູ້ຮັບຜິດຊອບເຂດເສດຖະກິດພິເສດສະຫວັນເຊໂນ.
