ບັນດາປະເທດບຣິກສ໌ຄວນເພີ່ມທະວີການຮ່ວມມືກໍ່ສ້າງພື້ນຖານໂຄງລ່າງ,ວັດທະນະທຳ
2017-09-04 17:33:04 cri
ກອງປະຊຸມເວທີປຶກສາຫາລືອຸດສາຫະກຳການຄ້າປະເທດບຣິກສ໌ປີ 2017 ໄດ້ໄຂຂຶ້ນຢູ່ເມືອງເຊ້ຍເຫມິນແຂວງຟູຈ້ຽນ ສປ ຈີນໃນວັນທີ 3 ກັນຍານີ້ ໂດຍ ທ່ານ ສີຈິ້ນຜິງ ປະທານປະເທດຈີນໄດ້ເຂົ້າຮ່ວມແລະກ່າວໄຂກອງປະຊຸມ. ໃນໂອກາດດັ່ງກ່າວ, ທ່ານ ຄາມັດ ຜູ້ວ່າການທະນາຄານພັດທະນາໃໝ່ບຣິກສ໌ໃຫ້ສຳພາດຕໍ່ນັກຂ່າວ CRI ວ່າ: ໃນໂອກາດທີ່ທ່ານ ສີຈິ້ນຜິງ ປາໄສ, ທ່ານໄດ້ບັນລະຍາຍໂອກາດທີ່ໄດ້ຮັບແລະສິ່ງທ້າທາຍທີ່ປະເທດບຣິກສ໌ພວມຜະເຊີນກໍຄືບັນຫາທີ່ຕ້ອງໄດ້ຮັບການແກ້ໄຂໂດຍດ່ວນໃນປັດຈຸບັນ ເຊິ່ງໄດ້ສ້າງຄວາມປະທັບໃຈໃຫ້ແກ່ຕົນຢ່າງເລິກເຊິ່ງ. ທ່ານ ກ່າວຕື່ມວ່າ: ຄຳປາໄສຂອງທ່ານ ສີຈິ້ນຜິງ ໄດ້ສົ່ງສັນຍານທີ່ສຳຄັນອັນໜຶ່ງ ເຊິ່ງນັ້ນກໍຄືປະເທດບຣິກສ໌ຄວນເພີ່ມທະວີການຮ່ວມມືໃນຂົງເຂດຕ່າງໆຕື່ມອີກ ໂດຍຕົນເຫັນພ້ອມແລະຊົມເຊີຍທີ່ສຸດ. ທ່ານ ຄາມັດ ກ່າວວ່າ: ກໍເໝືອນດັ່ງທ່ານ ສີຈິ້ນຜິງ ກ່າວ, ຕົນກໍເຫັນວ່າປະເທດບຣິກສ໌ຄວນເປີດກວ້າງການຮ່ວມມືໃນການກໍ່ສ້າງພື້ນຖານໂຄງລ່າງ,ການແລກປ່ຽນວັດທະນະທຳແລະຂົງເຂດອື່ນໆຕື່ມອີກຢ່າງແທ້ຈິງ.